Qilalugartat pinngortitamut qimaannarneqartartut
Qaammatip siuliani piniartut qilalugartatik Qaanaap eqqaani kangerlunnut qimaannartarpaat. Mattaa taamaallaat tiguneqartarsimavoq.
Qilalukkat pisareriarlugit mattaa tiguinnarneqartarpoq, neqaa erlaviilu pinngortitamut qimaannarneqartarlutik. Qaanaami piniartoq, Panigpak Daorana, pisut pillugit uppernarsaaniarluni arlalinnik assiliisimasoq taama oqaluttuarpoq.
Naalakkersuisut piniarnermi aalisarnermilu pisassiissutit ukiut tamaasa biologinit siunnersuutit eqqarsaatigalugit piujuartitsinissaq qulakkeerniarlugu aalajangersartarpaat. Piniartunit politikeriniillu pisassiissutinik qaffaasoqarnissaanut kaammattuisoqarajuttarpoq, piniartut allatut isertitaqarnissamut periarfissaqarnerat tunngavilersuutigineqartarluni.
Kisianni Qaanaami pisat tamakkiisumik atorneqartanngillat, Panigpak Daorana oqarpoq.
Isertitassaq annaaneqartoq
Assit aggustip qiteqqunnerani assilisimasaani qilalukkat pilanneqarsimasut, saarngi, neqaa aamma erlavii imaani puttallutik asiulerput.
Mattaa kisiat pinnagu sinnerisa qimaannarneqartarnerat qatsuppaa, neqaami Qaanaami piniartunut isertitanut ilaasinnaagaluarmat.
- Piniartut qilalugariarlutik mattaannai tigusarpaat, neqaalu imaani imaluunniit kangerlunni kiviarsertarlugu. Mattaannai sukkanersumumik aningaasarsiutigineqarlutik kiversarneqartarput, Panigpak Daorana, siornatigut piniartuusimasoq, Sermitsiaq.AG-mut taama oqaluttuarpoq.
Ileqqunik inatsisinillu unioqqutitsinerusoq
Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat naapertorlugu nerisassartai atorneqarsinnaasullu allat tamarmik angerlaanneqarlutilluunnit qimatulineqassapput. Pilaffiusimasoq perlukuiarneqarsimassaaq.
Unioqqutitsinerit akiliisitsinermik aamma pisamik arsaarinnissuteqarnermik Kalaallit Nunaanni pinerluttulerinermik inatsit malillugu pineqaatissiissutaasinnaapput, nalunaarummi allaqqavoq.
Sermitsiaq.AG piniarnermut naalakkersuisoqarfimmit oqaaseqartitsiniaraluarpoq, naalakkersuisoqarfiullu ajornartorsiutip aaqqiiviginissaanut qanoq iliortoqassanersoq paaserusullugu.
Piniarnermut naalakkersuisoqarfik allagaqarluni akissummini ilisimatitsivoq, pisoq pillugu naalakkersuisoqarfik saaffigineqarsimasoq, kisianni allanik oqaaseqartoqarsinnaanngilaq, misissuineq ingerlanneqarmat.