Qilalukkap tuugaavanik arsaarinnissuteqartoqarsimaneragaaneq akerlilerneqartoq
Inatsisartuni ilaasortaq Jens Napaattooq Naalakkersuisunut apeqquteqarpoq, piniarnermut nakkutilliisoq sanalulluni eqqumiitsuliortumit qilalukkap tuugaava arsaarinnissutigineqarsimanersoq. Tamanna ilumuunngitsoq, Naalakkersuisoq akissuteqarpoq.
Naleqqamiit Jens Napaattooq immikkut illuinnartumik tigussaasumillu paragraf 37 atorlugu apeqquteqarpoq:
- Ilumoorpa piniarnermut nakkuttilliisoq qilalukkap tuugaavanik arsaarinnissimasoq, sanaluttartup nammineq akilerlugu pisiarisimasaanik?
Aalisarnermut piniarnermullu Naalakkersuisup Kim Kielsenip (S) akissutimini arsaarinnissuteqarsimaneraaneq ilumuunnginnerarpaa, kisiannili suliaqartoqarsimavoq sanaluttartoq qilalukkat tuugaavinik sisamanik tuniniaasoqarneranut tunngatillugu:
Qilalukkap tuugaavi sisamat tuniniarneqartut
- Naamik ilumuunngilaq. Facebook-ikkut takuneqarsinnaariarmat sanaluttartoq qilalukkat tuugaavinik tuniniaasoq, piniarnermut nakkutilliisut nakkutilliinerminnut atatillugu sanaluttarfimmut alakkaapput.
- Piniarnermut nakkutilliisut sanaluttarfimmut ornigupput, tuniniaasorlu naapillugu. Pineqartoq qilalukkap qernertap tuugaavinik sisamanik tuniniaavoq. Pineqartoq ilisimatinneqarpoq saaffiginninnermut suna patsisaanersoq, Kim Kielsen akissuteqarluni allappoq.
Akissummi nassuiarneqarpoq eqqumiitsuliortoq pineqartoq ilisimatinneqarsimasoq inatsisinik qilalukkap tuugaavinik tuniniaasinnaanermut malittarisassanik allaqqasoqarneranik:
"Imm. 5. Taamaallaat inuussutissarsiutigalugu piniamermut allagartamik atuuttumik aamma akuersissummik naqissusikkamik peqartut, takuuk § 21, imm. 1, qilalukkat qemertat tuugaavinik imaluunniit qilalukkap qaqortap kigutaanik tunisisinnaapput. Allagartaq akuersissutip normutalik tuugaamut ilivitsumut allunaasartalerfugu ikkunneqassaaq."
Arsaarinnittoqanngilaq
Kielsen naapertorlugu arsaarinnittoqarsimanngilaq:
- Sanaluttartoq saaffigineqartoq inuussutissarsiutigalugu piniarnermut allagartamik atuuttumik imaluunniit akuersissummik naqissusikkamik peqanngilaq. Sanaluttartoq ilisimatinneqarpoq qilalukkap qernertap tuugaavinik sisamanik tuniniaasinnaanngitsoq, nalunaarummi piumasaqaatigineqartut naammassisimanngimmagit.
- Arsaarinnissuteqartoqanngilaq, Kielsen Napaattuumut akissuteqarpoq.