Qilammi qaamaneq eqqumiitsoq uissuummisitsisoq
Kalaallit Nunaanni sumiiffinni arlalinni qilammi qaamaneq ataasinngornermi unnukkut takuneqarsimavoq.
Kalaallit Nunaani ataasinngornermi unnukkut qilammi qaamanermik takunnittut arlallit Facebookikkut oqallisiginnipput.
Sermitsiaq.AG-p ilisimatusarfiit arlallit saaffigalugit apeqqutigaa qaamaneq suunersoq, sulili akissutisinani.
Takuneqartorli siorna apriilimi Alaskami pisumut eqqaanarpoq.
Taamanikkut Sciencealert-imi allassimavoq SpaceX-ip rakettianik Falcon 9-mik aallartitsineq pissutaasimagunartoq.
Kalaallit Nunaanni sumiiffinni arlalinni takuneqartoq
SpaceX nittartakkamini allappoq Falcon 9 ataasinngormat unnukkut aamma aallartinneqartoq.
Sciencealert naapertorlugu raketit Falcon 9-t suliassartik naammassillugu nunarsuarmut nunnikkiartornerini qaamaneq taamaattoq pilersinnaasartoq.
Taamaaliortoqartillugu ikummatissap sinnera silaannarmut aniatinneqartarpoq, taannalu qerrulluni krystaliarannguuttarpoq qaamanermillu ersersitsisarluni, taamaalillunilu spiralitut iluseqartarluni.
Ataasinngormat unnukkut inuit arlallit qilammi qaamanermik assilisaminnik Facebookimut ikkussipput, suusinnaaneranillu ataasinngormat unnukkut oqallittoqarpoq. Sermitsiaq.AG-p paasisai naapertorlugit Kangerlussuarmiit avannamut Qaanaaq ilanngullugu qaamaneq ingerlaartoq takuneqarsinnaasimavoq.