Qimaasoq pillugu ulloq ataaseq sioqqullugu kommuni paasitinneqarpoq

Kalaallit Nunaannut qimaasumik siullermik Kommuneqarfik Sermersooq tikilluaqqusinissaminut ullormik ataasiinnarmik piareersarnissamut periarfissinneqarpoq. Sermitsiaq.AG taama tusagaqarpoq.

Pineqartup tikinnissaa pillugu paasissutissiissutigalugu, kommuni sulisoqarnermut naalakkersuisoqarfimmut ataatsimiinnissamut aggersarneqarsimavoq.

Taamatut pisoqarnerani kommunip suut pisussaaffiginerai ersarissumik nalunaarutigineqartinnagit tamanna pivoq. Tassami tassunga inatsimmik inissiisoqarnikuunngilaq.

- Suliaq pineqartoq pillugu oqaaseqarsinnaanngilanga, kisianni inatsimmik tunngavissaqarnani sullissiniarneq unammillernartorujussuuvoq. Qimaasoq qanoq pisinnaatitaaffeqarnersoq aamma suut pisussaaffiginerlugit naluarput, Isak Nielsen Kleist, Kommuneqarfik Sermersuumi Atugarissaarnermut Suliffeqarnermullu Ingerlatsivimmi pisortaq taama oqarpoq.

Ukiut marluk sinnerlugit nipaarsaarunneqartoq

Sermitsiaq.AG-p uppernarsaaneratut, Naalakkersuisut suliaq pillugu ukiut marluk sinnerlugit Europap kangianit qimaasoq pillugu suliaq ilisimavaat, nammineerlutillu aamma suliamik suliarinneqataasimallutik. Taamaakkaluartoq tamanut ammasumik oqallitsitsisoqarsimanngilaq imaluunniit qimaasut tiguneqarnissaannut inatsimmik inissiisimanatik.

- Tamanna peqqissappat, ersarissumik inatsisitigut tunngaveqassaagut. Pisortani oqartussatut aatsaat inatsisitigut tungaveqarpat aningaasanik tunniussisinnaavugut imaluunniit sullissisisinnaavugut. Tamaattumik naleqqutinngitsorujussuarmik inissinneqarpugut, Isak Nielsen Kleist oqarpoq.

Inissamik utaqqisut aamma peqqinnissaqarfik

Tassami qimaasunik Kalaallit Nunaannut tikittoqaqqissinnaavoq. Qimaasoq qinnuteqarpat, taanna Europap kangisissuaneersoq assigalugu Kalaallit Nunaanni najugaqarnissamut qinnuteqarpat, pineqartoq suliap suliarineqarnissaanut pisinnaatitaaffeqarpoq.

- Qimaasunik amerlanerusunik Kalaallit Nunaannukartitsisoqassappat, sammisat isumaliutigeqqissaarneqartariaqarput. Peqqinnissaqarfimmi sivisuumik utaqqisoqareerpugut, qimaasumik annertuumik kingunerlutsitsisumik tigusaqassagaluarutta, peqqinnissaqarfimmut saniatigut artukkiinermik kinguneqassaaq, tamatumalu saniatigut inuk eqqortumik ikiorneqarnissaminut utaqqissaaq. Pisortat inissiaataannut Nuummi utaqqisut allattorsimaffiat aamma takivoq. Allaninngaanniillu qimaasunik tigusaqassagaluarutta unammillernartoqartitsissaaq.

Aningaasaqarneq pillugu erseqqissoqanngitsoq

Uani pineqartumik inuk universitetimi ilinniarsimasoq pineqarpoq, Sermitsiaq.AG-p paasissutissat pissarsiai naapertorlugit taanna suliffissarsisimavoq.

Kisianni qimaasumut allamut pisoq allaanerusinnaavoq, kommunimullu aningaasartuutit amerlanerulersinnaapput. Kommunit nutaanik suliassanik tunineqaraangata aningaasartaqartinneqartarnerat nalinginnaavoq. Kisianni uani Namminersorlutik Oqartussat erseqqissaasimanngillat.

- Aningaasaqarneq erseqqissarneqassaaq. Suliassat aningaasartaqartinneqarnissaat pillugit kommunit ersarissumik Namminersorlutik Oqartussat isumaqatigiissuteqarfigaat. Soorunami qimaasunut sulianut tunngatillugu isumaqatigiissutip atuunnera isumaqarpunga, kisianni tusagaqarnikuunngilagut, Isak Nielsen Kleist oqarpoq.

Suliaq pillugu allaaserisat tamaasa uani ataani atuakkit: