Qimusseriarsuarmi tuttut
Tuttulissuarmi, Kullorsuup Savissiviullu akornanniittumi, 1940-kkunnili tuttuerussimasumi tuttunik takusoqqittalersimavoq.
Tuttulissuaq, Qaanaap kommuneqarfiata iluaniittoq, taaguutaatigut tusaaneqarsinnaasutut qanga tuttoqarfiusimagaluarpoq. Aasaq manna tuttoqatigiit pingasut-sisamat norrartallit inunnit arlalinnit takuneqartarsimapput. Takunnittut - assiliisullu - ilagaat Nuussuarmiu Edvard Frederiksen.
Tuttut suminngaanniit taavungarsuaq pisimanersoq ilisimaneqanngilaq. Tuttulissuaq nuussuuvoq sermersuarmit avatangerneqarsimasoq.
Pinngortitaleriffimmi biologi Josefine Nymand oqarpoq periarfissat arlaliusut.
- Sisiviuumik nunami tassaniissimasinnaapput, aammali ingerlaarsimasinnaapput Uummannap eqqaani Nuussuarmiit imaluunniit Qaanaaq avannaani Inuarfissuup Nunaanit, erseqissumilli oqatigineq ajornaqaaq misissoqqissaarsimatinnagu.
Piniarnermut aqutsisoqarfimmi siunnersortaaneq Ole Heinrich oqarpoq Pinngortitaleriffik saaffigineqareersimasoq tuttut taavaniitut misissuiffigeqqullugit. Erseqqissarpaa tuttut taakku piniarneqarsinnaanngitsut, ukioq manna tuttuttunniarfissat avataanniimmat, taamaattumillu tuttunniarfiusinnaanani.
Allattugaatit pisoqqat naapertorlugit 1910-p eqqaanili Tuttulissuaq tuttueruppoq, 1940-kkunnili tuttuneqqikkaluarpoq, kingorna piniarlugit nungunneqartunik.