Qimusserlutik nakkutilliisut Sirius: Arnat misilittaapput piukkunnarnerlutik
DR maanna aallakaatitassiamik nangeqattaartumik ingerlataqarpoq, arnat tunup kitaatalu avannaarsuani qimussimik nakkutilleeqataasinnaanerminnut timikkut tarnikkullu piginnaasaqarnersut misilerarneqarluni.
Qimusserlutik Tunup avannaani Nunattalu avannaarsuani nakkutilliisut Slædepatruljen Sirius ukiut 50-it matuma siorna pilersinneqarmatali arnanik peqataasoqanngisaannarnikuuvoq. Sooruna? Tassami taakkununnga peqataassagaanni suiaassuseq kinaassuserlu inatsisitigut killilersugaanngillat.
Tamanna paasiniarlugu DR nangeqattaartuliorluni arnat suliassamut tassunga piukkunnarnersut misileraatitsivoq, tassani arnat 18-it immikkut toqqakkat piukkunnarnersiukkanut ilaasinnaanersut misilerarneqarput sakkortoorujussuarmik. Taakku arnat 18-iupput, taakkunanngalu angusisut Sverigemi misilittarneqarnissamut aamma ingerlaqqittussaallutik.
Arnat uppernarsassavaat timikkut tarnikkullu annertoorujussuarmik qasujaassuseqarlutik nukittuujullutillu, taamaammallu qimussimik nakkutilliisunut Siriusikkunnut ilaanissaminnut piukkunnarlutik. Nivi Geisler Kalaallit Nunatsinneersoq aallakaatitassiami peqataavoq.
Qimussimik nakkutilliisut Nunatta avannaarsua Tunullu avannaa nakkutigisarivaat
Sorsunnersuit aappaata kingorna sorsunneq nillertoq aallarteqqammertoq Danmark kissaateqarpoq Avannaarsuani Tunullu avannaani najuunnerulissalluni. Sakkutuut imarsiortut taamanikkut kissaatigivaat nakkutilliisunik ataavartunik pilersitsisoqassasoq.
1950-mi qimussimik angalallutik nakkutilliisut "Operation Resolut"-imik taaguuteqarlutik aallartinneqarput. Ukiut marluk ingerlareersullu "Slædepatruljen Sirius" taaguutigitinneqalerpoq, Canadamiut silasiorfiata "Resolute Bay"-imut paarlaattoorneqartarnissaa pinngitsoortinniarlugu.
Aaqqissuussaanikkut Sirius 2006-mi Grønlands Kommandop ataani inissinneqarpoq, ukiullu arfinillit qaangiummata Arktisk Kommandop ataanut inissinneqarpoq, 2012-mi Arktisk Kommando pilersinneqarmat. Ullumikkut Slædepatruljen Sirius sakkutuut immikkut ilinniarsimasut immikkoortortaqarfianni inissisimavoq, taamaattorli nakkutilliilluni angalasarnerit Arktisk Kommandop ataani suli inissisimallutik, Slædepatruljen Sirius Illersornissaqarfiup nittartagaani imminut ilisaritippoq.
Arnat malinnaaffigikkit
Manna tikillugu aallakaatitassiat marluk ingerlareerput, tassani arnat timikkut tarnikkullu nukittussusertik takutinniarlugu sakkortuumik misilerarneqarput, aallakaatitassiallu pingajuat takuneqarsinnaanngussaaq novembarip aappaaniit.
Suli isiginnaarsimanngitsut eqqarsaatigalugit aallakaatitassiami qanoq arnat qanoq ingerlanersut Sermitsiaq.AG-mit oqaluttuarissanngilarput, taamaallaalli innersuussutigiinnassavarput isiginnaarusukkaanni DRTV aqqutigalugu isiginnaartoqarsinnaammat, aallakaatitassiarlu qulequtaqarpoq "Slædepatruljen".