Qimussersuit piareerput
Aqagu arfininngorneq martsip 29-iat Avannaata Qimussersua Uummannami ingerlanneqassaaq.
Qimussertartut 29-it qimmiilu maanna Uummannamut tikissimapput Avannaata Qimussersuani peqataasussat.
Ippassaq sisamanngornermi peqataasussat sukkaniunnermi annoraat atugassatik tiguaat.
– Peqataasussat tamarmi ajoratik apuupput. Ilai qimussersimapput, allat snescooterinik aammalu ilai helikopter-erlutik, taama oqarpoq Mikkel Jeremiassen, Qimussertartut kattuffianni siulittaasoq.
Qimussersuit 29-it aqagu 40 kilometer-inik isorartussusilimmut sukkaniutissapput. Amerlanerpaamik qimmit 15-it atoqqusaapput qamutillu minnerpaamik 1 meter 50 centimeter-imik takissuseqassallutik.
Kommeqarfiit uku peqataatitaqarput; Upernavik (5), Uummannaq (8), Ilulissat (8), Qasigiannguit (3) kiisalu Qeqertarsuaq (5).
Uummannap illoqarfia tamassa pisoqarfiulluarpoq. Inuppassuit malinnaajartortut tikissimapput. Qimussimik misilittagartuut arlallit peqataapput, taakkulu ilagaat siorna ajugaasoq, Jørgen Kristensen qimussillammassuarlu Ville Siegstad. Assut pissanngatigineqarput siornatigut iluliarmiut Avannaata Qimussersuani ajugaaqqissanersut.