Qineqqusaartoq: Ajunngitsorsiat peerneqarlik
IA sinnerlugu Kommuneqarfik Sermersuumi kommunalbestyrelsimut qinigassanngortittup Mille Søvndahl Pedersen, ajunngitsorsiat peerneqarnissaat eqqarsaatersuutigaa
- Uagut politikerit ileqqoraarput siulersuisuni ilaasortaaffiit uagutsinnut ikinngutitsinnullu agguaannissaat. Aamma ileqqoraarput siulersuisunik pisariaqartitamit amerlanerit anginerillu pigisarneri. Tamatuma saniatigut ileqqoraarput siulersuisuni aningaasarsiat ajunngitsorsiarpassuillu suli qaffarsaqqittarat. Taamaaliorneq pitsaanerpaatut isiginngikkaluarlutigu kisiannili eqqarsarluta politikerit inuussutissaqartariaqartut. Taamaaliortarneq aningaasatigut ileqqorissaarnermullu iluaqqutaanngillat, tamannalu uanga allanngortikkusuppara.
Inuit Ataqatigiit sinnerlugit Mille Søvndahl Pedersen oqarpoq, taanna kingumut Kommuneqarfik Sermersuumi kommunalbestyrelsimut ilaasortanngorusulluni qineqqusaarpoq.
- Kommunalbestyrelsi IA-mit aqunneqartoq 2009-2013 angusaqarsimaqaaq. Politikkikkut sorsunnernik ingerlatsiffiusarsimavoq. Nammineq ajunngitsussarsiarisassanik annaasaqarneq kialuunniit nuannarinngilaa. Mikisualuttut iluarsaassatut taasinnaavavut politikerit akeqanngitsumik oqarasuaateqartitaanerat atorunnaarsinneqarmat, illuatungaani qaammammut oqarasuaatinut nalinginnaasunut tapi 169 koruuniusoq pineqartalerpoq. Taanna aallaavigalugu ukiumut 400.000 koruunit sipaarneqartarlerput. Kommunip milliardilikkuutaanik missingersuutaanni immaqa initorujussuanngikkaluarpoq alloriarneruvorli, Mille Søvndahl Pedersen tusagassiivinnut oqarpoq.
Peqqusiileqinaq aamma kanngunaq
- Assersuutit aappaattut tassaavoq Kanukoka. Kanukokap siulersuisuinut 2010 ilaasortanngorama siulersuisutut ukiumut 100.000 koruuninik ajunngitsussarsisinneqarpunga. Taamani siulersuisut siulittaasuat ukiumut 900.000 koruunit missaannik soraarnerussutisiat ilanngullugit ajunngitsussarsisinneqartarpoq. Tamanna peqqusiileqinarpoq kanngunarlunilu ukiumut ataatsimiinnerit arfineq-pingasut qulingilualluunniit peqataaffigisarlugit, Mille Søvndahl Pedersen erseqqissaavoq.
I 2010 besluttede et flertal at ændre loven, så menige medlemmer ikke længere fik honorar. 2010-mi amerlanerussuteqartut aalajangerput inatsimmik allanngortitsiniarlutik taamaasillutik ilaasortaannaat ajunngitsusiassarsisarunnaarlutik.
- Kisianni Kanukokami siulersuisut siulittaasuat (maannakkut Martha Abelsen, Siumut aaq.) suli 495.000 koruuninik ajunngitsussarsisarpoq kommunalbestyrelsimut ilaasortatut ukiumut 135.000 koruuninik ajunngitsussarsiarisartakkami saniatigut. Aaqqissuussineq nutaaq ukiumut 1,2 millioner koruunit sipaarutaavoq, kisianni suli Kanukoka kattuffiuvoq akisoqisoq. Kommuneqarfik Sermersuup 2013-imi tassunga ilaasortaanerminut 4 millioner koruuningajalluinnaat akiliutigai, Mille Søvndahl Pedersen eqqartuivoq, taassuma apeqquserpaa Kanukoka ullumikkut atorfissaqartinneqavinnersoq ilami kommunit sisamaannanngornikuummata.
Aningaasat pitsaanermik atorneqarsinnaapput
IA-politikeri naapertorlugu kommunit sisamat ilaasortaanerminnut ukiumut 11 millioninik akiliuteqartarput.
- Kanukokap aningaasaatigai 54 millioner koruunit. Tamakkua innuttaasunut iluaqqutaanerusumik atorneqarsinnaagaluarput, Mille Søvndahl Pedersen oqarpoq.