Qinersineq aaqqiinerunngilaq
Naalakkersuisut siulittaasuata Hans Enoksenip sermitsiaq.gl-imut oqaatigaa Kalaallit Nunaanni nunikkiornermik ingerlatsiviup Nukissiorfiit aktiaatileqatigiiffinngortiarnera pillugu naalakkersuisooqatigiit Siumukkut Atassutikkullu akerleriinnerat inatsisartunut qinersinermik kinguneqarnavianngitsoq.
– Nukissiorfiit siunissaa Siumup Atassutillu akoraniinnaq oqallisissaanngilaq, Hans Enoksen erseqqissaavoq.
– Aamma illuatungiliuttut tamarmiusut kattuffiillu arlallit ilaatigut sulisartut kattuffiata SIK-p allanngortitsinissaq itigartereerpaat, ilaatigut innaallagissamut, imermut kiassarnermullu siunissami akinik aalajangersaanissap tamakkiisumik kingunerisassai suliluunniit qulaajarneqanngitsut.
– Siunnersuutip saqqummiuteqqinneqannginnerani aktiaatileqatigiiffinngortitsinerup tamakkiisumik kingunerisassai sukumiisumik misissuiffigeqqaarnissaannik piumasaqaat naammasseqqaassavarpput, Hans Enoksen oqarpoq.
– Kisianni A/S-inngortitsinissamut Atassutip naaggarnerata Siumut naalakkersuisunut ilaasortaatitaata Aleqa Hammondip soraarneranut peqqutaanerpa?
– Maannakkorpiaq qinersinissaq pisariaqartinngivipparput, Hans Enoksen oqarpoq. Suliassat annertoorujussuit suliassaraagut, soorlu namminersorneq pillugu novembarip 25-iani taasinissaq, kommunit nutarternerisa januaarip 1-ianiit eqqunneqarnissaat aammalu urani pillugu innuttaasuni oqallinnissaq. Peqatigitillugu 2009-mut aningaasaqarnermut inatsisussaq ilaatigut Alcoap pilersaarussuanut aningaasaliissutissanik annertuunik imaqartoq inissinniartussaavarput. Naagga ulapaarnerup sukatseruttornerani qinersinissaq pisariqartinngivipparput,
Aleqa Hammondip naalakkersuisut aningaasaqarnermut inatsisissatut siunnersuutaat aggutsimi saqqummiukkamiuk isumaqatiginninniutigineqarsinnaanani oqallisigineqarsinnaasoq oqaatigaa.
– Isumaq taanna Aleqa Hammondip nammineerluni akisussaaffigaa, taamalu naalakkersuisut aammalu aningaasaqarnermut naalakkersuisussap nutaap isumaanut attuumassuteqarnani, Hans Enoksen erseqqissaavoq. Naalakkersuisut aningaasaqarnermut inatsisissatut siunnersuutaat soorunami Inatsisartuni isumaqatiginninniutissaavoq.