Qinersinerit siullersaanni Clinton qinerneqarnerpaavoq

Qinersisoqarnissaanut ullut aqqaniliinnanngortullu Clintonimut oqiliallaataasutut taaneqarsinnaavoq. Qinersisatut 19 millionit qinersereernerinit Reuters/Ipsos uuttortaanera aallaavigalugu Clinton 15 procentimik unammillertiminut Trumpimut siuariaqqavoq.

Qinersereertut 19 millioniusut qinersisinnaasut tallimararterutigaat.

Nalagaaffeqatigiinni Ohiomi Arizonamilu Clinton aamma siuttuusoq paasinarsivoq.

Presidentinngorniuuttut Demokraatit tupaallatsinneqareernerisa aqaguani uuttortaaneq saqqummiunneqarpoq. FBI-mi Clintonip e-malikkut attaveqaatigisimasai misissorneqaqqilissasut nalunaarutigaa. Tamannalu Demokraatineersup qineqqusaarnermini akornutigigaatsiarsimavaa.

Clintonimi Nunanut allanut naalakkersuisuunermini privatimik e-mailini atorlugu atorfilittani attaveqaqatigisarsimavai. E-mailillu nutaat nassaarineqartut presidentinngorniap attaveqaataani nassaarineqanngillat. Huma Abedinilli uiatalu Anthony weinerip, amerikkami politikkikkut suliaqartup, pigisaani nassaarineqarmata. Abedini Clintonip siunnersortaasa ilagaat, taassumalu uia Anthon Weiner siornatigut atoqatigiinnikkut kusanaatsuliornermi pingasoriarluni eqqartorneqartareerpoq.

Attaveqaqatigiinnerit nutaat paasineqartut qanoq sunniuteqarsinnaaneri qanorlu sivisutigisumik misissorneqassanersut FBI-mi pisortap James Comey-p oqaatigisinnaanngikkallarpaa.

Clintoni aasaq manna julimi eqqaartuussivimmit malersorneqarunnaaraluarpoq. USA-mi inatsiseqarnermut naalakkersuisuata Loretta Lynchip FBI-mit piumaffigineqarluni misissuineq taamaatinneqassasoq aalajangiummagu.

Qinersinermilu inerneriuaartussat misissuinerup nangeqqinneqarnerata sunnerumaarneraa suli oqaatigineqarsinnaanngilaq.

Uuttortaanermi e-mailit nutaat suli nassaarineqanngitsut suliarineqareermat. FBI-lli suli nalunaarutiginngikkaa misissuineq ingerlateqqinneqassasoq Hillary Clintonip e-mailianut tunngassuteqartut WikiLeaksip, tassa nittartakkatigut hackerisartut, saqqummiuppaat. Tamannalu unammillertaanut Donald Trumpimut siuariaataasimavoq.

Taamaakkaluartoq aningaasaatilissuup presidentitut qinerneqassanersoq suli qularnarpoq. Sisamanngormammi Hillary Clintonip presidentinngornissaanut ilimanaataa 95 procentiummat.

/ritzau/Reuters