Inatsisartunut qinersineq
Qinersinermi kukkuluttoqaqqinnera Kommuneqarfik Sermersuumit ajuusaarutigineqarpoq
Kommunip allaffiani allakkatigut taasinerit nassaarineqarput, Inatsisartunut qinersinermi kisitsinermi novembarip 28-anni ilanngunneqarsimanngitsut
Taamatut pisoqaqqippoq.
Kommuneqarfik Sermersuumi Inatsisartunut novembarip 28-ani qinersisoqarnerani allakkanik taasinernik nassaartoqarpoq, kingullermik taama pisoqarpoq
Kommunimut qinersinermi apriilimi 2013-mi.
Kommunip pisortaanerata Steffen Ulrich-Lyngep nalunaarutigaa.
Nuummi Kommuneqarfiup Allaffiani allakkatigut taasinerit pingasut nassaarineqarput, novembarip 28-anni Inatsisartunut qinersinermi kisitsinermi ilanngunneqarsimanngitsut. Qinersinermut Siulersuisut aalajangerput, taasinerit pingasut Qinersinermut Ataatsimiititaliamut aalajangiiffigineqartussanngorlugit nassiunneqassasut.
- Soorunami taamatut kukkusoqarsimanera kommunip ajuusaarutigaa, naak allakkatigut taasinerit annertuumik qitiutinneqarsimagaluartut, Steffen Ulrich-Lynge allappoq.
Nuummi Innuttaasunut Sullissivimmi allakkatigut taasinerit 41-t nassaarineqarput apriilip 25-ani 2013-mi. Taakku kukkunikkut piffissaq qaangiutereersoq qinersinermi aqutsisumut tunniunneqarsimallutik, taamaalillutik kommunalbestyrelsimut ilagiillu sinniisaannut qinersinermi apriilip aappaani 2013 kisitsinermi ilaatinneqarsimanatik.