Qinersinerup ingerlannissaanut piffissat imaapput
Qinersinissap nalunaarutigineqarnerata qinersinerullu ingerlanneqarnerata akornanni sivikinnerpaamik piffissaq qanoq sivisutigisoq ingerlassanersoq malittarisassaqanngilaq
Ukiut ingerlaneranni qinersinermut inatsisip arlaleriarlugu allanngortinneqartarnera pissutigalugu paasiuminaatsorujussuuvoq qinersinissap nalunaarutigineranit qinersinerup ingerlannissaanut piffissaq qanoq sivisutigisoq ingerlassanersoq inatsit atuuttoq qanoq oqarnersoq.
Sermitsiaq.AG pingasunngormat allappoq Naalakkersuisut siulittaasuat Kuupik Kleist, Inuit Ataqatigiit, ullumi sisamanngornermi nalunaaqutaq 14 Inatsisartunut qinersinissaq nalunaarutigissagaa, qinersinissarlu pissagunartoq marsip 12-anni.
Pingasunngormat aaqqissuisoqarfik Inatsisartut Allattoqarfiannit paasitinneqarpoq qinersinissap nalunaarutigineranit qinersinerup ingerlanneranut sivikinnerpaamik sapaatit akunneri tallimat ingerlassasut.
Maannali Inatsisartut Allattoqarfiata paasissutissat naqqippai, Sermitsiaq.AG-p allattoqarfik qinnuigereeraalu qinersinermut inatsit atuarluaqqullugu, qinersinissap nalunaarutigineranit qinersinerup ingerlannissaanut sivikinnerpaamik sivisunerpaamillu killissarititat samminerullugit.
Atuaruk ”Kuupik tusagassiortunik katersortitsiniarpoq”
Sapaatit akunneri arfinillit
Inatsisartut Allattoqarfiat allappoq:
- Ileqquusumik qinersinissaq Naalakkersuisut siulittaasuannit nalunaarutigineqassaaq qinigaaffiullu naannginnerani ingerlanneqassalluni. Inatsimmi allassimanngilaq ileqquusumik qinersineq siusinenrpaamik qaqugukkut ingerlanneqassanersoq. Naatsorsuutigineqarporli ileqquusumik qinersineq qinigaaffiup naanissaa qaammatinik pingasunik sioqqullugu pisinnaasoq.
- Maanaannaq qinersinissaq nalunaarutigineqarsinnaavoq tamatumunnga inatsit Inatsisartut akuersissutigippassuk. Ilanngullugu Naalakkersuisut siulittaasuat maanaannaq qinersisitsisinnaaavoq, Inatsisartut Naalakkersuisunik, imaluunniit Naalakkersuisunut ilaasortamik ataatsimik, tatiginninnginneq akuersissutigippassuk.
- Qinersinissaq nalunaarutigineqarajuttarpoq qinersinerup pinissaa sapaatit akunnerinik arfinilinnik sioqqullugu. Tunngaviusumik aporfissaqanngilaq qinernissap nalunaarutigineqarneranit qinersinerup ingerlannissaanut piffissap sivisunerujussuup ingerlanissaanut, Inatsisartut Allattoqarfiat paasissutissiivoq.
Marlunngorneq ileqquuvoq
Naatsumik oqaatigalugu: Inatsisartunut qinersinermut atatillugu qinersinissap nalunaarutigineqarneranit qinersinerup ingerlanneqarneranut sapaatit akunneri arfinillit ingerlagajuttarput. Aamma qinersinermut inatsimmi - Inatsisartut Allattoqarfiat malillugu - allassimanngilaq qinersineq marlunngornikkut ingerlanneqassasoq, tamannali ileqquuvoq.
Suli ilimanarluinnarpoq marsimi qinersissasugut.
Qinersinermut inatsit pillugu annertunerusumik atuarit uani aamma uani.