Qinersinissaq pillugu paasissutissat nalinginnaasut

Partiit nutaat Inatsisartunut novembarip 28-ani qinersinissamut qinigassanngortikkusuppata piffissaq sivisuallaanngilaq.

Taamatuttaaq qinigassanngortittunik nalunaarutiginninnissamut piffissaq sivisuallaanngilaq.

Namminersorlutik Oqartussani pisortaaneq Svend Hardenberg Qinersinermut Ataatsimiititaliamut siulittaasuunini tunngavigalugu ilisimatitsivoq, partiit nutaat, qinersinermut qinigassanngortikkusuttut, atsiornernik 964-inik katersisimasariaqartut. Atsiornerit taakkua Qinersinermut Ataatsimiititaliamut nalunaarutigineqarsimassapput kingusinnerpaamik tallimanngornermi oktobarip 24-ani.

Atsiornerit ukioq ataaseq sinnerlugu pisoqaassusillit atorsinnaanngillat.

Qinigassanngortittut

Inuit qinersisinnaatitaasut kikkulluunniit Inatsisartunut qinigassanngortissinnaapput. Partiimut imaluunniit kisimiillutik qinigassanngortissinnaapput imaluunniit kattusseqatigiillutik qinigassanngortissinnaallutik. Kisimiilluni qinigassanngortissagaanni qinersisartunit ikinnerpaamik 40-nit amerlanerpaamillu 50-init qinigassanngortinneqarsimasariaqarpoq.

Qinigassanngortittunik nalunaarutiginninneq pissaaq kommunimi qinersinermi siulersuisunut tallimanngornermi novembarip 7-ani nal. 12 nallertinnagu, Svend Hardenberg ilisimatitsivoq.

Taasisinnaatitaaneq

Nunami maani taasisinnaatitaassagaanni Kalaallit Nunaanni najugaqartariaqarpoq sivikinnerpaamillu qaammatini arfinilinni maani najugaqarsimasariaqarluni. Kalaallit Nunaata avataanut nuukkaanni, aamma piffissami sivikinnerusumiluunniit, Kalaallit Nunaanni qinersinermut taasisinnaatitaaneq annaaneqartarpoq.

Taamaattoq inuit ilaat malittarisassamit tassannga immikkut ittumik akuerineqartarput. Taakkua tassaapput ilinniagaqartut, peqqissartut, Folketingimut ilaasortat aamma Namminersorlutik Oqartussanut sinniisut inuillu tamatumunnga naligitinneqarsinnaasut allat, taakkualu inooqataat aapparisaallu. Taakkua Kalaallit Nunaanni qinersinermut taasisinnaatitaanerminnik tigumminniinnarsinnaapput. Tamatumanili piumasaqaatigineqarpoq, Kalaallit Nunaata avataani najugaqarnerup pigallartuunissaa, kiisalu ukiuni atasuinnarni minnerpaamik marlunni Kalaallit Nunaanni najugaqareersimanissaq.

Inuit taakkua kommunimi kingullermik inuit nalunaarsorsimaffianni allanneqarfigisimasaminni qinersisussat allassimaffiannut piffissaalluarallartillugu ilanngunneqarnissamik qinnuteqarsimassapput. Inatsisartunut qinersinermut taasisinnaatitaaneq atorsinnaassagaanni qinersisussat allassimaffiannut ulloq qinersiviusussaq sioqqullugu sapaatip-akunnerini pingasuni ilanngunneqarsimasariaqarpoq.