Qinersiviit 72-iusut qinersinissamut piareerput
Taasiartorfissat tamakkerlutik Inatsisartunut qinersinissamut taasivissanik tigusisimalerput. Namminersorlutik Oqartussani nunamut namminermut immikkoortortaqarfik tusagassiorfinnut taama nalunaaruteqarpoq.
Nunami taasiartorfissani 72-iusut Inatsisartunut 6. april qinersinissamut piareerput. Qinersinissaq sapaatip akunneranik sioqqullugu, tassa marlunngornermi Tele-Post uppernarsaavoq Inatsisartunut qinersinissamut taasivissat taasiartorfissani tamani maanna tiguneqarsimalersut. Tamanna Naalakkersuisut Siulittaasoqarfiani nunamut namminermut immikkoortortaqarfiup tusagassiorfinnut nalunaaruteqarluni uppernarsarpaa.
Inoqarfiit 72-iusut tamarmik taasivissanik nassiussuiffigineqalernerannit ullut qulit qaangiuttut taasivissat tamarmik tiguneqarsimalerput.
- Taamatut angusaqarneq Tele-Postip, Air Greenlandip, kommunit Naalakkersuisullu maligassaqqissumik suleqatigiinneranni pisinnaasimavoq, oqarpoq Klaus Georg Hansen, Nunamut Namminermut Immikkoortortaqarfimmi immikkoortortaqarfimmut pisortaq, Inatsisartunut qinersinissamut piareersaanermut akisussaasuusoq.
Anorersuaq, killilersuutit poorskilu
Taasiviit taasiartorfissanut tamanut Tele-Post ukioq manna nassiussuigami assigiinngitsunit unammillerneqarsimavoq. Tele-Postimi sullissivimmi pisortaq oqaluttuarpoq pingaartumik pissutsit pingasut unammilliisimasut.
- Coronamut tunngatillugu killilersuinerit aammalu påskernissaa pissutigalugit nalinginnaasumik pisartunit timmisartuussinerit ikinnerusimapput. Tamatuma saniatigut Air Greenlandimi teknikki silarlunnerani sumiiffini arlalinni unammilligassaqartitsisimapput, oqaluttuarpoq.
Qamuteralaat biilillu
Pissutsit allaaneruneri pissutigalugit allaanerusunik periarfissaqartariaqarsimavoq taasiviit tamakkerlugit piffissaangallartillugu apuukkumallugit. Allakkanik aatsisartoq ilaatigut qamuteralannik angalalluni sikukkullu biilerluni taasivissanik sumiiffiit ilaannut apuussuisariaqarsimavoq.
Air Greenlandimi Cargo Sales Manager Heinrich Duko Sørensen paasissutissiivoq, Air Greenland TELE-POST qanimut suleqatigalugu timmisartuussinissamut pilersaarutini annikinnerusunik allanngortitsisimasoq, taamaalilluni allakkat taasivissanik imallit ornigassanut akunniffissaminnut tikiunneqareerneranni sukkasuumik aqqummut ingerlaqqiffissaannut anngutsinnissaat qulakkeerneqarsinnaasimalluni.