Qivittoq immaqa Saqqameersuuvoq
Ilulissani Politiit oqaluttuarput tusatsiarneqartoq qivittoq Saqqameersuusoq.
Qivittoq, aappariit malillugit sapaatip akunnerani kingullermi aavartillutik arnamik 35-inik ukiulimmik ajortumik pinnittoq, tilluarlugu isimmitsarlugulu, qularnanngitsumik nunaqarfimmiuuvoq.
Taamatut Sermitsiamut paasissutissiivoq Ilulissani Politeeqarfiup pisortaa Preben Markvardtsen.
- Ullumi (marlunngornermi, aaqqiss.) aappariit telefonikkut killisiorpavut, ullunilu makkuani fogederput nunaqarfiliartissavarput. Ajoraluartumik uagut nammineq aappariit najugaqarfiannut nunaqarfiliarsinnaanngilagut, aatsaat sapaatit akunneri marluk -pingasut qaangiuppata, angallannermi ajornartorsiuteqarneq pissutigalugu. Angallateqanngilagut atorsinnaasatsinnik. Pisimasumi nutaartatuaavoq tusatsiarneqartualermat qivittoq immaqa Saqqameersuusoq. Silarsuatsinni tusatsiakkat pimooruttariaqarpavut. Taamaattumik malinnaavugut paaserusullugu tusatsiakkat qanoq ilumoortiginersut, Preben Markvardtsen oqarpoq.