Qoorortuuaraq naalisillugu pilattorneqarsimasoq pinnguartarfimmi nassaarineqartoq
Nuummi meeqqeriviit ilaanni sulisut julip naalernerani tupaallannartumik nassaarput. Politiit uppernarsaapput meeqqeriviup pinnguartarfiani sioqqeriffimmi aallaammik nassaartoqarsimasoq.
Aallaasit meeqqat inugaannut inissinneqartassapput. Malittarisassaq taanna isumatusaarnerusoq nunatsinni innuttaasunit amerlanerulluinnartunit malinneqarpoq.
Taamaakkaluartoq meeqqeriviup silami pinnguartarfiani aallaammik nassaartoqarpoq. Aallaat nassaarineqartoq sioqqanik pinnguartarfiusumi, meeqqat arlallit pinnguarfigisartagaanni, nassaarineqarpoq.
- Qinngorpumi meeqqeriviup silataani sioqqanik pinnguarfimmi aallaammik illuinnarsuutaasinnaasumik 31. juli 2023 nassaartoqarsimanera uppernarsarsinnaavarput. Aallaat qoorortuuaraagaluarpoq, aallaasilli savissaa ipualu pilattorlugit kipineqarsimapput, aallaat illuinnarsiutitut isikkoqalersillugu, Kalaallit Nunaata Politiivini allattoqarfimmi pisortaq Emil Maegaard-Hoffmann Sermitsiaq.AG-mut oqaluttuarpoq.
Suliaq pinerluttoqarsimasutut suliatut paasiniaaffigineqartoq
- Aallaasit illuinnarsuutit nunatsinni inerteqqutaammata, suliaq pinerluttulerinermut inatsit tunngavigalugu politiinit suliassatut ingerlanneqarpoq, ilisimatitsissutigineqarpoq.
Politiit maannakkuugallartumut nalilerpaat aallaat aaqqiagiinnginnermut attuumatillugu sakkussiatut atornissamut siunertaqanngitsoq.
- Kalaallit Nunaata Politiivisa kaammattuutigiumavaat aallaasit paarnaarsaaserlugit meeqqallu inungaannut inissinneqartassasut. Politiit ilanngullugu kaammattuutigerusuppaat aallaasinik illuinnarsuutinik pigisaqartoqarneranik ilisimannittoqarpat, innuttaasut ilisimannittut politiinut saaffiginneqqullugit, Emil Maegaard-Hoffmann oqarpoq.
Qoorortuuaraq nassaarineqartoq kimit pigineqarnersoq politiinit suli ilisimaneqanngilaq. Suliamut tunngatillugu ilisimannittut politiinut tlf. 70 14 48-mut saaffiginneqquneqarput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...