Qulimiguulik Narsap kujataatungaani ajunaalernermi mittariaqarsimasoq
Qulimiguulik Narsaq kujataatungaani pingasunngornermi ualikkut ajunaalernermi mianersortumik mittariaqarsimavoq. Ajunaartoqanngitsoq, politiit ilisimatitsipput.
OBS: Politiit eqqornerusunik paasissutissaateqalermata qulimiguulik nakkarsimanngitsoq, taamaattorli ajunaalernermi mianersortumik mittariaqalersimasoq nalunaarutigineqarpoq. Paasissutissat eqqortut tunngavigalugit allaaserisaq aaqqinneqarpoq.
Qulimiguulik najukkami suliffeqarfimmit pigineqartoq, Narsap kujataatungaani pingasunngornermi ualikkut ajutoorsimalluni mittariaqalersimasoq, politiit nalunaarfigineqarput.
Qulimiguulik ajutoorsimasoq politiinut nalunaarutigineqarpoq pingasunngornermi ualikkut nal. 14:11. Nalunaarutiginninnermi annanniut qummoroortittagaq naatsorsorlugu Narsamit 13 kilometerisut ungasitsigisumiissangatinneqarsimavoq. Arktisk Kommando annaassiniarnermi ilaasussanngortinneqarmat, annaassiniarneq pilertortumik aallartinneqarpoq.
Sermeq Helicopters, qulimiguulimmik piginnittuusoq, Facebookimini aamma nassuiaateqarpoq. Tassani nassuiarneqarpoq qulimiguulik ajoquteqarnermik nalunaarsimasoq.
- Qulimiguulik ilaasoqanngilaq, qulimiguulimmillu aquttoq kisimiilluni. Taanna SAR-imi annaassiniartunit qulimiguulimmit annanneqarpoq, Qaqortumilu peqqinnissaqarfimmukaanneqarluni. Annertunerusumik ajoqusinngilaq, Sermeq Helicopters allappoq.
Timaa nillorluinnarsimasoq
Politiit ilisimatitsipput annaassiniartut sumiiffik nakkarfiusimasoq nassaarisimagaat, qulimiguulimmillu aquttoq inuunerminik navianartorsiunngitsoq, timaali nillorluinnalersimasoq, nassaarineqarsimasoq.
- Aquttoq imaanit qaqinneqarpoq Qaqortumilu peqqinnissaqarfimmut oqqunneqarluni passunneqarsimalluni. Aquttoq tassaavoq angut qallunaaq 40-nik ukiulik. Qulimiguulimmi allanik ilaasoqanngilaq, politiit ilisimatitsipput.
Politiit oqartussat allat, taakkunani havarikommissioni peqatigalugu, susoqarsimanera maanna paasiniarpaat.
Annaassiniarnermi politiit, peqqinnissaqarfimmi sulisut qatserisartullu, kiisalu Air Greenlandip annaassiniarnermi qulimiguua aamma ilaasimapput.
Sermeq Helicopters pisoq pillugu annertunerusumik oqaaseqarsinnaanngilaq, suliaq oqartussanit misissuiffigineqarmat.