Qulimiguulimmik kisitsisoqareersoq: Umimmanniarneq februaarip 15-ani ammassaaq
Piniartunut nutaarsiassaq nuannersoq. Piniartut maanna sullisitik ateriarlugit aallaasitillu tigoriarlugit Kangerlussuup eqqaani umimmanniarsinnaalerput.
Aalisarnermut Piniarnermullu Naalakkersuisoq ukiuunerani 2024-mi Kangerlussuup eqqaani umimmanniarnissamut pisassiissutinik, piffissaliussanik aamma piniarfissanik aalajangeeqqammerpoq. Umimmanniartoqarsinnaavoq. Taama Aalisarnermut Piniarnermullu Naalakkersuisoqarfik paasissutissiivoq:
- Kangerlussuup eqqaani umimmannik qulimiguulimmik kisitsisoqaqqammerpoq, taamatullu umimmaqatigiinni suiaaneri ukiuisalu inissisimaneri pillugit misissuisoqqaqqammerluni. Tamanna tunngavigalugu Naalakkersuisoq pisassiissutinik, piffissaliussanik taamatullu piniarfissanik aalajangeeqqammerpoq.
Qimussinik motoorilinnillu atuinikkut umimmanniarneq
Kangerlussuup eqqaani piniarfik 1-imi qimussertartunut allatigullu assartuutinik motoorilinnik atuiffiunngitsumik ukiuunerani 2024-mi umimmanniartoqassaaq piffissami 15. februaarimiit 25. februaari ilanngullugu. Piniarfik 1-imi umimmattassat 50-iupput.
Aalisarnermut piniarnermullu Naalakkersuisoq Kim Kielsen (S) Sisimiuni innuttaasunik ataatsimiisitsimmat umimmanniarnerup unitsikkallarneqarsimanera pillugu piniartut isornartorsiusimapput.
Kangerlussuup eqqaani piniarfik 3-mi assartuutinik motoorilinnik piniarfimmut piniarfimmiillu assartuutitut atuiffigeqqusaasumik ukiuunerani 2024-mi inuussutissarsiutigalugu umimmanniartoqassaaq piffissami 15. februaarimiit 25. februaari ilanngullugu, naalakkersuisoqarfik ilisimatitsivoq. Piniarfik 3-mi umimmattassat 200-rput.
- Aalisarnermut Piniarnermullu Naalakkersuisoqarfimmiit erseqqissaatigineqarpoq assartuutit motoorillit umimmannut taamatullu tuttunut minnerpaamik 500 meter-inik ungasissuseqassasut. Assartuutit motoorillit soorlu qamuteralaat ATV-llu umimmannik malersuinermut ungoorinermullu atoqqusaanngillat. Naggataatigut aammattaaq erseqqissaatigineqassaaq umimmanniareernerup kingorna pisanik nalunaaruteqarnissaq inatsisit malillugit piumasaqaataammat, Naalakkersuisoqarfik ilisimatitsivoq.