Qulimiguulimmut aallaasersortoq: Tarniluttut napparsimmafianni piffissaligaanngitsumik tigummineqarnissaa piumasarineqarpoq

Angut 21-nik ukiulik inunnik 14-inik toqutseriarsimasutut unnerluunneqartoq Kalaallit Nunaata Politiivisa marlunngornermi ullaap tungaani nalunaarutigaat.

Angut qulimiguullip tikikkiartorluni milernerani siorna 22. marts aallaasersorpoq, maannalu tamanna unnerluussinermik kinguneqarpoq.

Unnerluussut Sermitsiaq.AG-p pissarsiaraa, tassanilu nassuiarneqarpoq unnerluussisussaatitaasup piumasarigaa angut Danmarkimi tarniluttut napparsimmavianni aalajangersimasumik sivisussusilerneqanngitsumik tigummigallarneqartussanngortinneqassasoq.

Qoorortuuaraq aallartiinnariaq tillissimagaa

Unnerluussummi nassuiarneqarpoq pisut katillugit 28-it unnerluussutigineqartut - taakkunani ilaallutik inunnik katillugit 14-inik toqutseriarsimaneq.

Unnerluussummi aamma nassuiarneqarpoq politiit isumaqartut angut Narsami talittarfimmi aalisariummiit qoorortuuaqqamik aallaasersornermi atugassaminik tillissimasoq.

Allaat tassaavoq qoorortuaaraq aallartiinnariaq, kaliber .17 HMR, Savage model A17.

Ullut marluk sioqqullugit toqumik siorasaarisimasoq

Aallaasersorneq 22. marts 2023 nal. 16.30 aamma nal 17.15 akornanni pivoq.

Ullulli marluk sioqqullugit, tassa 20. marts, unnerluutigineqartup inuk Narsamiittoq toqumik siorasaarsimavaa, oqarsimallunilu aallaammik aallilerluni.

Aallaasersornermi inuit marluk aallaallugit eqqorneqarsimasut, inuillu allat pingasut aallaasersornerup nalaani aamma ajoqusersimasut, politiit ilisimatitsipput.