Qulingiluanik ukiulik pinngitsaalineqartoq
Angut 55-inik ukiulik niviarsiaqqamik qulingiluanik ukiulimmik pinngitsaalillugu atornerluisimasutut pineqaatissinneqarpoq, AG allappoq.
Angut 55-ink ukiulik marlunngornermi 28. juli pineqaatissinneqarpoq niviarsiaqqamik qulingiluanik ukiulimmik pinngitsaaliisimasutut. Angut niviarsiaqqamik atoqatiginagu allatut kinguaassiutitigut kanngunartuliorsimasutut ukioq ataaseq pinerluuteqarsimasut inissiisarfianiittussanngortinneqarpoq.
Sisamanngornermi AG allappoq, tamanna Kangaatsiap Kommuniani pisimasoq juulip 9-ani. Suliap qanoq innera peqqutigalugu Aasianni politiit malillugit angut pilertortumik pineqaatissinneqarsinnaasimavoq. Angut tigummigallarneqarsimasoq siusinnerusukkut nakuusersimasutut kinguaassiutitigullu kanngunartuliorsimasutut pineqaatissinneqareersimavoq. Kisiannili meeqqanik atornerluisimasutut siusinnerusukkut pinerluuteqarsimanngilaq.
Angutip niviarsiaraq ilisarisimasimavaa, niviarsiaraq ilaquttanilu angutip angerlarsimaffiani inisimasuusimammata. Kangaatsiami isumaginnittoqarfik pisimasoq nalunaarutigineqarmalli akuliutsinneqarsimapput. Kangaatsiap Kommuniani isumaginninnermut allaffik peqqinnissaqarfik suleqatigalugu maanna misissuilerput niviarsiaraq ilaqutaalu qanoq ikiorneqarnissaminnik pisariaqartitsinersut.