Raajat igitat pillugit ingerlatseqatigiiffik mianersoqqusivoq
Inuit ilaat Facebook aqqutigalugu raajanik igitanik tuniniaaniarsaripput, Royal Greenlandillu inuit raajanik piseqqunagillu nereqqunngilai.
![Raajat igitat pillugit ingerlatseqatigiiffik mianersoqqusivoq](https://image.sermitsiaq.ag/111239.webp?imageId=111239&width=960&height=642&format=jpg)
Raajat tunisassiorfiup Ilulissaniittup eqqaavissuanut iginneqarsimasut Facebookikkut tuniniarneqarput.
Taama Royal Greenland tusagassiuutinut nalunaarummi allappoq.
Ilulissani aalisakkeriviup raajanik tunisassiorfiani raajat iginneqaqqammerput, Royal Greenlandillu raajanik pisinissaq nerinissarluunniit mianersoqqussutigaa:
- Raajat taakku pitsaassusilerinermut isumannaallisaanermullu najoqqutassiatsinnik sukannersunik eqquutsitsinngitsut, taamaammallu nerineqarnissaminnut naleqqutinngitsutut ilimagineqartut Royal Greenlandimit erseqqissarneqarpoq. Raajat pineqartut innuttaasut pisiarissanngikkaat nerissanngikkaallu sukannersumik innersuutigaarput.
Royal Greenland naapertorlugu inuit assigiinngitsut Facebookikkut raajanik tuniniaapput.
- Pisoq pillugu oqartussat attaveqarfigaavut. Royal Greenlandimi pisisartutta isumannaatsumik atuisuusinnaanissaat peqqisuunissaallu pingaartilluinnarparput, siunissamilu assingusumik pisoqannginnissaa pillugu suliniuteqassaagut, Royal Greenland allappoq.