RAL-ip umiarsuaataata Disko Linep ilaasui angallappai
Maniitsup eqqaanilu nunaqarfiit akornanni Disko Linep ilaasunik angallassiniarnermini sapaatip akunnerini pingasuni unammillernartoqartitsivoq. Umiarsuaatileqatigiiffiup maanna RAL-ip umiarsuaataa ilaasunik angallassinissamut attartorpaa.
Royal Arctic Linep umiarsuaataasa ilaat, Maleraq Arctica, Disko Linep ullumi pingasunngornermi aqagulu sisamanngornermi attartussallugu aalajangerpoq.
Nunaqarfinnut pajuttaat taamaattumik RAL-ip angalanissamut pilersaarutaanit peerneqarpoq, taarsiullugu Disko Linep ilaasuinik Maniitsup nunaqarfiillu akornanni angallassissaaq.
Disko Line tusagassiuutinut naatsumik taama nalunaaruteqarpoq.
Tamatuma inernerissavaa inuit 15-it sapaatip akunnerini pingasut iluanni apuussinnaasimanngisat apuussinnaalissasut, Disko Line ilisimatitsivoq.
- Ilaasussat tamarmik, napparsimaveqarfiillu attuumassuteqartut toqqaannartumik angallassinissaq pillugu paasitinneqarnikuupput, taamaalillutillu pingasunngorpat sisamanngorpallu apuuffissaminnut apuunneqassallutik, Disko Line tusagassiuutinut nalunaarummi allappoq.