RAL-p ingerlanneqarnera naammagisimaarpaat
Naaka aningaasatigut ilungersunartorsiortoqaraluartoq umiarsuaatileqatigiit ikkarlissimanngillat, Naalakkersuisut isumaqarput.
Naminersorlutik Oqartussat umiarsuaatileqatigiiffiat Royal Arctic Line pisortaaneralu Jens Andersen suliffeqarfiup ataatsimeersuarnerani naveerneqanngillat. Akerlianilli aqutsisut nersualaarneqarput.
Nuummi Hotel hans Egedemi pingasunngormat Royal Arctic Line nalinginnaasumik ataatsimeersuarmat tamanna erserpoq.
Naalakkersuisut paasitinneqarput Royal Arctic Line nunarsuarmi aningaasatigut ajornartorsiortoqaraluartoq aningaasartuutiminik killilersimaartitsisimasoq naatsorsuutinilu sinneqartoorluni.
Aamma allatigut Royal Arctic Line naalakersuinikkut anguniakkanik naammassinnippoq. Naalakkersuisut anguniagaasa ilagaat nunat Kalaallit Nunaata eqqaamiuinik Islandimik Amerikallu nunavittaanik suleqateqatiginerisa niueqatiginerisalu annertusinissaat.
- Naalakkersuisut naatsorsutigaat Royal Arctic Line nangittumik tassunga tunngatillugu suliniuteqassasoq. Taamaattumik paasigatsigu nuannaarutigaarput, Royal Arctic Line A. P. Møller - Maersk Gruppenip suliffeqarfiutaa Danbor Service A/S suleqatigalugu januaarip aallaqqaataaniit 2010-miit suliffeqarfik Arctic Base Supply A/S pilersissimamagu, Ineqarnermut, Attaveqarnermut Angallannermullu Naalakkersuisoq Jens B. Frederiksen piginnittut sinnerlugit oqaaseqarnermi ilaatigut taama oqarpoq.
Suliffeqarfiup nutaap siuenrtaraa uuliasiorfiit siunissami nunatta imertaani sulilersussat kiffartuunnissaannut neqerooruteqarnissaq.
- Assartugassatigut appariartoqaraluartoq nuannerpoq, suliffeqarfik nutaaliorsinnaammat niuerfissanillu nutaanik pilersitsilluni, Jens B. Frederiksen oqarpoq.