Randi: Saagut peerlugit - inersimasuuvugut
Imigassamut inatsit assortuussutaasoq atorunnaarsillugu Demokraatit inatsimmik nutaamik taarserniarpaat, ussassaarisoqarsinnaanngorlugu ammasarfiilu sivitsorsinnaanngorlugit.
Imigassamut inatsit nutaaq marsip aallaqqaataani atuutilersoq atorunnaarsinneqassaaq, imigassamullu inatsimmik killilersuivallaanngitsumik taarserlugu, ussassaarisoqarsinnaanngorlugu, ammasarfiit sivitsorlugit, imigassamik ajornartorsiutillit ataasiakkaat tulluussakkamik katsorsarneqartarnissaat aamma qulakkeerlugu.
Demokraatit siulittaasuat Randi Vestergaard Evaldsen tusagassiuutinut nalunaarummi taama nalunaaruteqarpoq.
Randi: Ajornartorsiutigut saagut tunuanut toqqortissanngilagut
Demokraatinit Inatsisartunut qinersinissamut qinigassanngortittup Randi Vestergaard Evaldsenip nalunaarutaa naapertorlugu, imigassamut inatsit inuiaqatigiinnut innuttaasunullu iluaqutaasariaqarpoq.
- Inatsit atuuttoq piviusorsiunngippallaaqaaq. Sooruna ajornartorsiutit sorlaqarfii isiginiarneqanngitsut, ajornartorsiutit qaangissagutsigit eqqartorsinnaanissat qallorlugit pisariaqavissorpoq, taanna oqarpoq, nangillunilu:
Imigassamik eqqussuineq nioqqutissiornerlu appariartortoq
Naatsorsueqqissaartarfimmit kisitsisit nutaat, marsip aallartinnerani saqqumminneqartut takutippaat, imigassamik eqqussuineq tunisassiornerlu 2017-imi 2016-imut sanilliullugu appasinnerusimasoq.
- Taamaakkaluartoq Siumut, IA aamma Partii Naleraq isumaqarput saagut tunuannut imigassaq toqqorterneqartariaqartoq. Soorunea ajornartorsiutit sorlaqarfii isiginiarneqanngitsut?, Randi Vestergaard Evaldsen imigassamut inatsimmut taama isornartorsiuivoq.
Ammasarfiit sivitsorniaraat
Randi Vestergaard Evaldsenip oqarnera naapertorlugu Demokraatit imigassamik tuniniaaneq pisiniarfiit ammasarfiinut malinnaatilerniarpaat.
- Tassa imaappoq, niertarfiit ammanerminni imigassaarniarsinnaassapput. Taamaaliorutta tulleriiaarlutik utaqqisut piissavagut aamma niuerneq allatulli ingerlanneqalissaaq. Taamatut suliniuteqarnitsigut anngiortumik nioqquteqartartut akiorniarpagut taamaasillutalu pinerluttut atugaat ajornerulersillugit, Randi Vestergaard Evaldsen oqarpoq.
Inuusuttut ussassaarutinit ajoquserneqarneq ajorput
Ussassaarutit inerteqqutaalernerisigut, niuertarfinni imigassat assersorneqarnerisigu aamma ammasarfiit killilersornerisigut ajornartorsiutit aaqqinneqarnavianngitsut, Randi Vestergaard Evaldsenip oqarnera naapertorlugu Demokraatit isumaqarput.
- Arraami ila; pilerisaarutit takujuarpagut aamma inuusuttunik illersorneqarnissaannik neqitsersorneq isumaqanngilaq. Nunatsinni inuusuttut nunani allaneersuut tv-kanalit takujuarpaat aamma interneti atortuarpaat tassanilu takusinnaajuarlugit imigassamut pilerisaarutit. Taamaattumik innarlerneqarunnanngillat, Randi Vestergaard Evaldsen oqarpoq.
Assigiinngitsunik imigassamik atornerluisarnermut katsorsariaatsinik piumasaqartut
Demokraatit Inatsisartuni partiini kisiartaallutik imigassamut inatsimmut akuersinngillat.
- Suli naaggaarnerput aalajangiusimavarput aamma ilungersuutigissuarput inatsisip atorunnaarsinneqarnissaa. Imigassamut inatsit partiit sinnerisa innuttaasunik upperisaarunnerannut uppernarsaataavoq nutaanerpaaq, Randi Vestergaard Evaldsen oqarpoq, nangillunilu:
- Imigassamut assigiinngitsunik katsorsaariaatsinik peqartariaqarpugut, innuttaasut ataasiakkaanut tulluartumik katsorsaasinnaasunik namminneq toqqaasinnaanngorlugit.