Tunngaviusumik inatsit
Randi: Tunngaviusumik inatsisissaq pillugu Isumalioqatigiisitaq quianaannarpoq
Tunngaviusumik inatsisissaq pillugu Isumalioqatigiisitaq Demokraatit ''kanngunaannartumik quinartuusoq'' oqaatigaat.
Isumalioqatigiissitaq sulinngitsoq saqqummiunneqarmat, ''IA-p Siumullu nalulermassuk kikkut ilaasortaasinnaatitaanersut paasisinnaanngimmassuk'' isumalioqatigiissitamik pilersitsipallannerup kiinaa maanna ersersinneqartoq, Demokraatit siulittaasuat Randi Vestergaard isumaqarpoq.
Katitigaanerat isumaqatigiissutaanngitsoq
Tassani siulittaasup Vivian Motzfeldtip, Siumut, oqaaseqarneranut unnersuussisoqarpoq.
- Isumalioqatigiissitami ilaasortat qanoq katitigaassanersut nalornissutigineqarmat, Isumalioqatigiissitami sulineq unitsinneqarallarpoq, Vivian Motzfeldt (S) KNR-imut taama oqarpoq.
Atassummi ilaasortap Mala Høy Kukop partiimut Siumumut nuunnerata aamma IA-meersup Ane Hansenip borgmesterinngornermini sulinngiffeqarnissamik qinnuteqarnerata kingorna ajornartorsiut pilerpoq.
Tatigeqatigiittoqanngitsoq
KNR naapertorlugu siulittaasup Naalakkersuisut ''isumalioqatigiisitami kikkut ilaasortaasinnaanerat'' paasinissaat utaqqivaa.
- Kanngunariaqqiffissaqanngilaq kisianni ajoraluartumik pisut ersersiinnarpaat naalakkersuisoqatigiit suleqatigiinnerat sussaanngitsoq tatigeqatigiittoqannginnera pissutigalugu, Demokraatit siulittaasuat tusagassiuutinut nalunaarummi allappoq.
Illumut nutaamut 7 millionit
Naalakkersuisoqatigiit aamma Tunngaviusumik Inatsisissaq pillugu Isumalioqatigiisitap allaffeqarfissaanut aningaasaliissutinik 7 millionit koruuninik akuersissuteqarfigisimagaat Demokraatit maluginiarpaat. Aningaasaliissuteqarneq taanna Demokraatit itigartitsissutigisimavaat.
- Naalakkersuisut naalakkersuisoqatigiillu pimoorussillutik sulisariaqalerput massakkummi pissusilersuutigineqartut inuiaqatigiinni politikerit isigineqarnerannut aseruilluinnarsinnaapput, tamattami ajoquserneqartussaagatta, Randi Vestergaard Evaldsen isumaqarpoq.