saammaateqatigiinneq
Randi V. Evaldsen: Isumaqarpunga Demokraatit nukittuujulluta
Ippassaq sapaammi Demokraatit nalunaarutigaat Michael Rosing partiimi suleqataaqqilertoq. Siulittaasoq Randi V. Evaldseni isumaqarpoq partii nukittuujusoq, taamaattoq suna iluminni aaqqiagiinngissutigisimanerlugu annertunerusumik oqaaseqarfigerusunngilaa.
- Isumaqarpunga nukittuujulluta. Uagut partiitta iluani akerleriissinnaasarpugut, kisianni ilutsinni aaqqiagiinngissutinik aaqqiisinnaasarpugut.
Ippassaq Michael Rosingip partii suleqataaqqilersimanera pillugu Demokraatit siulittaasuat, Randi Vestergaard Evaldsen, Sermitsiaq.AG-mut taama oqarpoq.
Itisileerusunngitsoq
Michael Rosingi piffissami sivisuumi partiip iluani suleqatigiissinnaannginneq pissutaalluni suleqatigiumaneerussimangaluarpoq. Partii nammineq taama nalunaaruteqarsimavoq.
Aamma atuaruk: Demokraatit iluminni isumaqatigiilertut
Maannalu Michael Rosing partiimit tikilluaqqusaaqqeriasaalerpoq. Sunali aaqqissuutaasimanersoq, Randi V. Evaldsenip oqaatigiumanngilaa.
- Aaqqissutissamik pitsaasumik isumaqatigiissuteqarsimavugut, annertunerusumillu oqaaseqarfiginissaa pisariaqarsorinngilara. Aaqqiagiinngissutit aaqqiissuteqarfigisimavagut, suleqatigiinnerulli nanginneqarnissaa isumaqatigiissutigalugu.
Qularnanngilaq qinersisartussi suna aaqqiagiinngissutigisimanerissi paaserusussagaat. Sunaaana isumassini akiliutigalugu isumaqatigiittusi?
- Aaqqiagiinngissutaasimasut aaqqissuteqarfigaagut, suleqatigiinnerpulli aallarteqqissimallugu. Tassa tamanna aaqqissuterput, partiip siulittaasua oqarpoq.
Aamma atuaruk: Marlunnik qinigaaffeqarneq Demokraatit aaqqiagiinngissutigaat
- Ilutsinni ajornartorsiutit iliuuseqarfiginiarsarivagut
Sammisaq Demokraatinut eqquinerluppoq. Sammisap taama ittoq partiimut mikisumu ilaasortaminillu annaasaqallattaasumut uloriarnartorsiutitsisoq, politikkikkut oqaaseqartartup, Naja Paulsenip oqaatigisamavaa.
Aamma atuaruk: Randi: Michaeli gruppimi peqataajunnaarsimavoq
Tamanna Randi V. Evaldsenip isumaqataaffiginngilaa.
- Isumaqarpunga inissisimalluarluta. Demokraatit nukittuujupput, taassumali (Michael Rosing aaqq.) suleqatigeqqilernera pitsaasuuvoq. Ilutsinni aaqqiagiinngissutaalersinnaasut, tusagassiuutitigut immitsinnut malersuutinngikkaluarluta iliuuseqarfiginiarsarisarpagut, tamannali nukittoqutigaarput, Randi V. Evaldsen oqarpoq.
Sammisaq pillugu qinersisartussi sunniuteqarnerlussinnaanera qanoq eqqarsaasersorfigaajuk?
- Tamanna iluminni aaqqiagiinngissuteqartunut tamanut atuuppoq. Partiit tamarmik iluminni aaqqiagiinngissuteqalersinnaasarput tamanna partiinut tamanut pitsaasuunngilaq. Maannalu uangut taama nalaataqarpugut akuerisariaqarluguli. Politikki taamaappoq.
Aamma atuaruk: Politikkikkut oqaaseqartartoq: Demokraatit ajutoornerat assut ajornartorsiutaasoq
Poul Hansen attaveqarfigineqanngitsoq
Politikkeri misilittagartooq Poul Hansen, partiip marlunnik qinigaaffeqartarnermut isumaanut akerliulluni sapaatit akunneri arlaqanngitsut matuma siorna tunuarpoq. Poul Hansenilu partiimut aamma utissanersoq ilisimangeqanngilaq. Partiimi tassunga attaveqarsimanngilaq.
Aamma atuaruk: Poul Hansen Demokraatinit ilaasortaajunnaartoq
- Naamik, Poul Hansenimut attaveqarsimanngilagut aamma taanna uagutsinnut attaveqarsimanngilaq, Randi V. Evaldsen oqarpoq.
Michael Rosingimut tunngatillugu taanna Inatsisartuni gruppimi suleqataaqqilersimavoq. Inatsisartulli ukioq manna ukiaanerani ataatsimiinnerani ataatsimiititaliani ilaasortaaffeqalersinnaassaaq.