Rasmus Willumsen-haus Tysklandimi ammarneqalerpoq
Alfred Wegener Institut, Issittoq aamma immap pissusaa pillugit ilisimatusarfissuaq Tysklandimi Bemerhavenimiittoq, sisamanngornermi ilaneqassaaq teknikkikkut sullissivimmik, taannalu Wegenerip ilisimasassarsiornermini angalaqataanut kalaallimut Rasmus Willumsen-imut Upernavik Kujallermi inunngorsimasumut Ukkusissanili Uummannap eqqaani nunaqarsimasumut atsiunneqassaaq.
Rasmus Willumsen-ip soraluaqqiutaa, Johan Willumsen Tysklandiliarluni kingumut angalaqqippoq. Siullerpaamik Tysklandimiippoq 2019-mi, taamani Rasmus Willumsen-hausip sananeqarnissaanut nivariaqqaarnermi peqataassalluni, taanna illu Alfred Wegenerip instituttianut atatinneqarluni teknikkikkut sullissivittut Tysklandimi Bremerhavenimi pilersinneqassaoq siunnerfigineqarmat.
Johan Willumsen oqaluttuarpoq akkaani Hans Peter Willumsen ingerlaqatigisussaagaluarlugu, taanna Rasmus Willumsen-ip qanitaani qaninnerpavoq pineqartumut soraluaagami. Taamaattorli angallannikkut periarfissat kipusoorsimanerisigut Hans Peter Willumsen Tysklandilianngitsoorpoq, taamaalillunilu ammaanersiornermut 19. oktober ingerlanneqartussamut peqataasinnaajunnaarluni.
- Assut ajuusaarnarpoq akkaga, Hans Peter Rasmussip qaniginerpaasaatut inissisimasoq (soraluaagami, aaqq.) ammaanersiornermi peqataasinnaajunnaarmat. Taamaattorli assut nuannaarutigivara soraluaqqiutaallunga alloriaqqittoqarnerani qaaqquneqarama, tamatumuuna illup ammarneqarnissaanut qaaqqusaallunga, Johan Willumsen, Bremerhavenimut Tysklandilialerluni timmisartumut ikiliivilluni Sermitsiaq.AG-mut oqarpoq.
Asseq una illup sanaartorneqarnissaanut atatillugu nivariaqqaarnermi assilisaavoq:
Wegenerip Willumsen assut nuannarivaa
Nunarsuarmi ilisimasassarsiortartut akornanni tusaamasaanerpaat ilaata Alfred Wegenerip aammalu ilisimasassarsiornermini qimussertorisaata Rasmus Willumsenip qilerutaat paasisinnaassagaanni takorluukkat 1930-mut utertinneqassapput aammalu nunarsuarmi pinngortitap peqqarniissinnaanerpaaffianiittuusisariaqarpoq Sermersuarmi.
Tassami Willumsen 1930-mi Alfred Wegeneip pingajussaanik Kalaallit Nunaata Sermersuani ilisimasassarsiornerani qimussertuusutut peqataavoq. Taakkuli angalatillutik imminnut maliinnavillutik ajunaarput.
Tamanna uppernarsarneqarpoq Wegenerip ullorsiutaani sukumiisumik sunik tamanik allattuiffigisarsimasaani, tassami imminnut maliinnavillutik ajunaarput, siulliulluni Wegener ajunaarpoq, ajunaarmallu Willumsenip peqqissaaqqissaarluni iliversimavaa namminerlu ingerlaqqilluni, taannali tammaaneqarpoq kingornalu nassaarineqarani. Wegenerilli ilerra kingusinnerusukkut nassaarineqarpoq aamma taassuma allagaatai Willumsenip ilisinermini innarlitsaaliorlugit ilanngussimasai nassaarineqarlutik, taamaattumik qularnaatsumik ilisimaneqarpoq taakku marluullutik anorersuarsuarnut akiuukkaluarsimasut Sermersuup qeqqani ilisimatusarfimmut Eismitte-mut apuunniaraluarnerminni.
Alfred Wegener allattugarpassuarmi ilaani arlalissuartigut ersersitsisarpoq Rasmus Willumsen ataqqilluinnarlugulu tatigisimagaa.
6. oktober 1930-mi Wegener ilaatigut allassimavoq: ”[...] Qinnuigaassi [...] Rasmusip angalanitsinni peqataaqqittussap nalunaaqutaarassaanik tuninissaa isumagilaarisiuk.
Imaq pillugu ilisimatusarnermut illu atorneqassaaq
Rasmus Willumsen-hausip sanaartorneqarnissaanut nivariaqqaarnermut atatillugu, Dr. Karsten Wurr, Alfred Wegener Institutsimi pisortaanerusoq illup taassuma qanoq atorneqarnissaa pillugu ilaatigut imatut nassuiaavoq:
- Teknikkikkut sullissivik taanna annertuumik immap sikullu pissusaannik ilisimatusarnermi atortorissaarutit pitsaanerulersinniarnerini pilersueqataassaaq. Alfred Wegenerip Institutsiata annertusarneqarnerani siunertaavoq ilisimatusarnikkut teknikkikkullu paasisimasaqarnerup inerisaanerullu ataatsimut illoqarfimmi ataatsimi katersorneqarneratigut suleriaaseq pitsaanerulersinniarneqarpoq, ilaatigut laboratoriat sulliviillu ataatsimut atorluarnerisigut. Illup qaliata ataatsip ataani sulinikkut ilisimatusarnikkut ilisimatuussutsikkullu suleqatigiinneq annertusarneqassaaq, ilaatigut ingeniørit nunallu pissusaanik ilisimatusartut akornanni, aammalumi ilinniartut ilinniartitsisullu akornanni suleqatigiinneq nutaaliorfiusoq ingerlanneqarsinnaalissaaq immallu pissusaata nakkutigineqarneranut ilisimatusarfigineqaranullu qaffassataassalluni.