Royal Greenlandimut millionerpassuit akuerineqarput
Inatsisartut aningaasaqarnermut ataatsimiititaliaani amerlanerussuteqartut akueraat Royal Greenland landskarsimit 500 millionit koruuninik pissarsissasoq.
Aningaasaliineq ilaatigut 250 millionit koruuninik taarsigassarsiineruvoq ilaatigullu aktiatigut aningaasaatit amerlaqataannik qaffannerisigut.
Aningaasaqarnermut ataatsimiititaliap aalajangiinerani erserpoq Royal Greenland taarsigassarsisinneqarnermini katillugu 6,25 millionit koruuninik ernianik akiliissasoq, illuatungaatigut milliardit affaasa landskarsimiitiinnarnerisigut erniatigut isertitassaraluit 10 millionit koruunit landskarsip annaassallugit.
Demokraatit Inuit Ataqatigiillu aalajangiinermi amerlanerussuteqarnissaq qulakkeerpaat, Siumut akerliusoq. Taamatut namminersortunit pigineqartumut taarsigassarsisitsinermi landskarsip aningaasaataasa tigoriaannaat ilanngarterneqarnissaat kukkusutut isigigamiuk partiip itigartitsinerminut pissutiginerarpaa. Illuatungaatigut Royal Greenlandip attartornissaanut Namminersortut qulakkeeruteqarnissaat pisariaqaraluarpoq, Siumut taamatut isumaqarpoq.
Aningaasaqarnermut ataatsimiititaliaq sapaammi ualikkut ataatsimiinnermini aalajangiivoq.