Rubinisiorfik matugallarneqartoq
Aappaluttumi rubinisiorfik matugallarneqassasoq Greenland Ruby aalajangerpoq. Rubinisiorfimmi sulisut 30-t sisamanngornermi 22. december soraarsitaanermik paasissutissiissummik nassinneqarput.
LNS Greenlandimi sulisut arlallit 22. decemberimi pisortanit nalunaarfigineqaramik, tusagartik juullimut kissaatigisimanavianngivippaat.
Nuup kujataani Qeqertarsuatsiaat eqqaanni Aappaluttumi rubinisiorfimmi sulisut 30-t sisamanngornermi soraarsitaanermut tunngasumik allagarsitinneqarput.
Sulisunik soraarsitsinermut tunngavilersuutigineqarpoq Greenland Ruby aalajangersimasoq rubininik piiaaneq unitsikkallarneqassasoq, piiaaffiullu eqqaa qanoq rubineqartiginersoq misissorneqarluni. Sulisut allat Aappaluttumi suli suliinnassapput misissuillutik.
LNS Greenlandimi siulersuisuni siulittaasoq, Frode Nielsen Sermitsiaq.AG-mut nassuiaavoq Greenland Ruby aalajangiisuusimasoq. LNS Greenlandili ingerlatsisuugami sulisunik suliunnaarsitsisariaqarsimasoq.
- Assaavinni marlunni malm piiagassatta 64 procentia piiarsimalereerparput. Piiaaffiup eqqaani qanoq annertutingisumik rubineqarnersoq paaseqqaartariaqarparput piiaanerup nangeqqinnginnerani, LNS Greenlandimi siulersuisuni siulittaasoq, Frode Nielsen Sermitsiaq.AG-mut nassuiaavoq.
Qaqugu piiaasoqaqqissanersoq nalunarpoq
Siulersuisuni siulittaasup oqaatigisinnaanngikkallarpaa piiaaffimmi qaqugu piiaasoqaqqilissanersoq. Rubinisiorfiusup eqqaata rubineqassusaa misissorneqaqqaartariaqarpoq.
Soraarsitsinermili allakkami, Sermitsiaq.AG-p pissarsiarisimasaani rubininik piiaanerup ingerlanneqarnera 1. januar 2023-miit qaammatini aqqaneq-marlunni tulliuttuni uninngagallartussatut naatsorsuutigineqartoq allassimavoq.
- Piiaaffiup qaqugu ammaqqinneqarnissaa paasissavarput sumiiffiup eqqaata qanoq rubineqartiginera paasereerutsigu. Kingusinnerusukkut tamanna nalunarumaanngilaq. Erseqqissaassutigissavarali matusigallarnerummat, Frode Nielsen Sermitsiaq.AG-mut oqarpoq.
Taassuma oqaatigaa Aappaluttumi piiaaneq ukioq manna ingerlalluarsimasoq, pilertortumillu piiaasoqarsimasoq. Piiaanissamut isumaqatigiissut naapertorlugu rubinisiorfik tamakkiisumik ingerlatillugu 80-inik sulisoqarsinnaavoq.
Aappaluttumi rubininik piiaanermik suliaqartut True North Gems 2016-imi akiliisinnaajunnaarmata LNS Greenland suliamik ingerlatsilernikuuvoq. Isumaqatigiissut siulleq naapertorlugu rubinisiorfik ukiuni qulingiluani ingerlanneqarsinnaasoq naatsorsuutigineqarsimavoq.