Rubinit pillugit Nuummi akerliussutsimik takutitsineq
Peqatigiiffik 16. august innuttaasut ataasiakkaat kikkulluunniit nunap pisuussutaanik pinngortitamiittunik akissarsiorsinnaatitaanera illersorlugu akerliussutsimik takutitsivoq.
Nuummi akerliussutsimik takutitsineq illoqarfiup qeqqani Brugsenip Legelandillu akornaniit nal. 12.45 aallartippoq, tassangaaniillu Inatsisartut ataatsimiittarfiata saani ergalasulertarfimmut ingerlaarlutik, tassani peqatigiiffik 16. augustip atsiortitsinerit 3000-it sinneqartut nunatta naalakkersuisuinut tunniullugit.
Peqatigiiffiup innuttaasut kikkulluunniit nunap pisuussutaanik pinngortitamiittunik akissarsiorsinnaatitaanissaat sorsuutigaa, taamalu innuttaasut piumassusaannut uppernarsaatit politikerinut akisussaasuusunut tunniullugit.
– Inuit maannamut 3000-it sinneqartut 16. Augustimut tapersersuillutik atsiortitsitersimapput, taakkulu Kalaallit Nunaanni innuttaasut inersimasuusut 10 procentiisa amerlaqatigaat. Tapersersuineq tamanna naatsorsuutigisamit annertunerujussuuvoq, aammalu Kalaallit Nunaanni inuiattut najugaqartutullu piginnaatitaaffitsinnut uppernarsaataalluni, Peqatigiiffik 16. august tusagassiorfinnut nalunaarummi allapput.