Ruslandip Issittumi Siunnersuisoqatigiinnut aningaasanik tunniussisarnini unitsippaa
Issittumi Siunnersuisoqatigiinni „sulinerup eqqortup“ aallartinnissaata tungaanut Ruslandip ukiumoortumik akiligassani akilertarunnaarpai.
Ruslandip Issittumi Siunnersuisoqatigiinnut ukiumoortumik akiliuteqartarnini unitsippaa.
Tamanna nunap nunanut allanut ministereqarfianit russit nutaarsiassaqartitsiviannut RIA-mut nalunaarutigineqarpoq, Reuters pingasunngornerup unnuaani qallunaat nalunaaqutaat malillugu allappoq.
Siunnersuisoqatigiinni „sulinerup eqqortup“ aallarteqqinnissaata tungaanut Ruslandip aningaasanik tunniussisarnera unitsinneqartoq oqaatigineqarpoq.
- Ruslandip Issittumi Siunnersuisoqatigiit missingersuutaannut ukiumoortumik tapiissutai maannakkorpiaq unitsinneqarput, nunat ilaasortaasut tamarmik peqataaffigisaannik sulinerup ingerlateqqinneqarnissaata tungaanut, ministeriaqarfik RIA-mut oqarpoq.
Ruslandilli nunanut allanut ministereqarfia oqarpoq Ruslandip maannakkut siunnersuisoqatigiinnit aninissartik eqqarsaatiginngikkaa.
2022-mi februaarimi Ruslandip Ukraine tiguarmagu Issittumi Siunnersuisoqatigiit ataatsimiittarneri unitsikkallarneqarput.
Rusland siunnersuisoqatigiinnut qanoq akiliuteqartarnersoq paasissutissaqanngilaq.
Siunnersuisoqatigiit 1996-imi pilersinneqarput, ilaasortaasullu tassaapput USA, Canada, Rusland, Danmark, Finland, Sverige, Norge Islandilu.
Danmarkimi nunanut allanut ministereqarfiup oqaaseqarnissaa Ritzauip sulissutigaa.
Danmarkip Issittumilu Siunnersuisoqatigiinni nunat ilaasortat allat arfinillit Ruslandip saniatigut taamaaliornissaq isumaqatigiissutigaat.
Issittumi Siunnersuisoqatigiinni nunat ilaasortaasut Issittumut tunngasut, soorlu avatangiisinik illersuineq, silap pissusia, peqqissutsimut tunngasut, imarsiornermi suleqatigiinneq Issittumilu piujuartitsisumik aningaasarsiornerup ineriartortinnissaa, oqallisigisarpaat.
2022-mi juunimi – siunnersuisoqatigiit sulinerat ukiumi tamatumani marsimi unitsikkallarneqareersoq – Danmarkip ilaasortallu allat Ruslandi ilanngunnagu aalajangerput suleqatigiinneq killilimmik ingerlateqqissallugu.
Tamanna pivoq siunnersuisoqatigiit suleqatigiissitaasa arfinillit suliniutaanni, Ruslandip peqataaffiginngisaani, suleqatigiinnermut tunngatillugu.
Sapaatip-akunnerata siuliani russit nutaarsiassaqartitsiviat Tass Reuters naapertorlugu Ruslandip nunanut allanut ministeriata oqaaseqartartuata Maria Zakharovap Issittumi Siunnersuisoqatigiit aamma oqaaseqarfigisimavai.
Tassani allassimavoq siunnersuisoqatigiit „Ruslandimut inussiarniiffiusutut ineriartorpata“ Ruslandip ilaasortaaginnarnissani eqqarsaatigissagaa.
/ritzau/