Russit kilisaataat Tunup sineriaaniittut
Sapaatip-akunnerani kingullermi russit kilisaataat sisamat nunatta killeqarfiatigoorput. Tamannali Kalaallit Nunaanni Aalisarsinnaanermut Akuersissutinik Nakkutilliisoqarfik naapertorlugu pasinartoqanngilaq. Issittumi Sakkutooqarfik tamatumunnga oqaaseqarumanngillat.
Sapaatip-akunnerata siuliata naanerani nakkutilliinermik kiffartuussivinni Marinetrafficimi aamma Vesselfinderimi russit angallataat sisamat nunatta sineriaata 200 sømilit iluanni takuneqarsinnaapput.
KANUAANA-mi siunnersortaaneq Mads Nedergaard Sermitsiaq.AG-mut tamatuminnga uppernarsaavoq.
Issittumi Sakkutooqarfik nunatta imartaani nakkutilliinermut akisussaasuusoq kilisaatit tassaniinnerat pillugu oqaaseqarumanngilaq. Taakku attaveqarnermut immikkoortoqarfiat allalluni akissuteqarpoq.
- Issittumi Sakkutooqarfik suliaq pillugu oqaaseqarusunngilaq.
Mads Nedergaard KANUAANA-meersoq oqaaseqarusuppoq. Nalinginnaasumik russit umiarsuaat aalisartut nunat tamalaat imartaanni Irmingerhavetimiittartut, taanna oqaluttuarpoq, taakkulu silarlunnera pissutigalugu Kalaallit Nunaanni Tunup sineriaanut qaninnerusumukartariaqartartut oqaatigaa.
Sumiiffimmi Ruslandimut pisassiissutinik isumaqatigiissuteqartoqanngitsoq, siunnersortaanerup oqaatigaa, kisianni pisoq ernumassutissaqannginnerarpaa.
- Nunarsuarmi imavissuit tikinneqarsinnaajuaannarput, sukkassuserisimasaallu naapertorlugu aalisarsimanngitsut takusinnaavarput, taamaammat arlaannik pasinartumik suliaqarsimanissaat pissutissaqarsorinngilarput.
Piffissami kingullermi russit umiarsuaat Danmarkip eqqaani takuneqartut, umiarsuit isertortumik paasiniaanerannut pissutissaqartoqarnikuunerisa akerlianik, taakku kilisaatit sisamat AIS-minnik ikumatitsisimapput, taamaalillutik nakkutilliinermik kiffartuussivinni arlalinni aamma illersornissaqarfiup nakkutilliiviini takuneqarsinnaallutik.
Kilisaatit taakku sisamat nunat tamalaat imartaannut ingerlaqqereerput.