Ruth H. aalassassimaarpoq
Siumumiit Inatsisartunut ilaasortap KNI-p nukissiornermut immikkoortortami Maniitsumiit Sisimiunut nuunniarnera 'akuersaarneqarsinnaanngitsutut ataqqinninnginnertullu' taavaa.
Ukiup nikinnerani Maniitsumi borgmesteriusimasup maannakkullu Inatsisartunut ilaasortap Ruth Heilmannip paasisimavaa KNI-p nukissiornermut immikkoortortani Polaroil Maniitsumiit Sisimiunut nuussagaa.
Tamanna pillugu naalakkersuinermik sulialik Siumumeersoq aalassassimaarpoq. Ruth Heilmann Naalakkersuisunut § 36 naapertorlugu apeqquteqarpoq, sooq Namminersorlutik Oqartussat suliffeqarfiutai illoqarfinniit allaniit nuunneqaratik Maniitsumiit nuunniarneqarnersut, eqqortuusinnaanersorlu Polaroilip 12-nik sulisulik ukioq manna Sisimunut nuunnissaa?
– Maniitsumi innuttaasutut naalakkersuinikkullu akisussaasutut ajorluinnarpoq akuerineqarsinnaananilu ukiup nutaap ulluani siullermi taamatut paasitinneqarneq, Ruth Heilmann apeqquteqaammini tunngavilersuivoq.
Tikkuarpaa ukiut arlallit matuma siorna KNI-p qullersaqarfiata Sisimiunut nuunneqarnera 'tamatsinnut Maniitsormiuusunut ajuallannartuummat', innuttaasunimmi 100-inik Maniitsoq annaasaqarpoq taakkulu malitsigisaanik.
– Isumaqarpunga taama pisoqarnera naalakkersuinikkut akuersaarneqarsinnaananilu ataqqinninnginnerusoq, akuersaarneqarsinnaanngitsorlu, Ruth Heilmann allappoq, Naalakkersuisullu kajumissaarlugit Polaroilip Maniitsumiiginnarnissaannut iliuuseqaqqullugit.
KNI-mi siulersuisut naalakkersuinikkut toqqakkat KNI-mi pisortat Polaroilip ingerlatsiviata KNI-p qullersaqarfianut Sisimiuniitsumut nuunnissaanik aalajangiinerat siorna oktobarimi akuersaarpaat,.
Polaroilimi sulisut 12-t tamarmik Sisimiunut nuunnissaminnik neqeroorfigineqarput.
– Aqutsinikkut, allaffissornikkut teknikkikkullu piginnaasaqarfiit katersuunnerat KNI-p iliuuseqarsinnaaneranut periarfissanik pitsannguinernillu kinguneqassaaq, tusagassiuutitigut nalunaarummi KNI-p nittartagaani decembarip 10-ani 2009-mi allassimavoq.
Pisortaq Peter Grønvold Samuelsen sermitsiaq.AG-mut nalunaarpoq, nuunneq aallartereersoq ukiorlu manna juunip 1-taa tikitsinnagu naammassereersimassalluni.