Ruth Heilmann tunuliaqutaasa isumaqatiginngilaat
- Kinguneqartitsisinnaanngilluinnartoq. Siumup Inatsisartuni gruppiata taasinermik peqquserlunnermik pisimasumi ilartik Ruth Heilmann taamatut taavaat.
- Inuk ataaseq, taasineq ataaseq.
- Tassa taamaattussaavoq, taamaattumillu taasinermik peqquserlunneq kinguneqartariaqarpoq.
Siumup inatsisartuni gruppiata siulittaasua Otto Jeremiassen ukiortaami oqaaseqaammini taamatut isumaqarpoq.
Taamaasilluni inatsisartut siulittaasuata Ruth Heilmannip 2008-mi juullip siuninngua taasinermik peqquserluttunut sisamanut inerniliinera isumaqatiginngilluinnarpaa.
- Sooq tamatta isumaqatigiissutigisinnaanngilarput inatsisartuni politikerit tamarmik, demokratimi periutsit pingaarnersaannik, inuk ataaseq taasineq ataaseq, unioqqutitsisimasut ingerlaannavik Inatsisartuni ilaasortaajunnaarsinneqassasut, tullianik qinersinissap tungaanut? Qanorluunniit parteeqaraluaraanni nimaartumillu utoqqatsissuteqaraluaraanni! Qularutiginngillilarput 2009-mi taamatut iliuuseqartariaqartugut, immitsinnut tatigileqqissagutta nunallu tusaamasaaneranik iluarsiiniapalaassagutta.
- Siumup Inatsisartuni gruppiata Siulittaasoqarfiup inerniliinera kinguneqaateqanngilluinnartoq isumaqatiginngilluinnarmagu, gruppip sulissutigaa inatsisartunut ilaasortat Inatsisartuni namminneq inatsimminnik unioqqutitsisimasut politiinut tunniunneqarnissaat, Ole Jeremiassen allappoq.