S: D kalaallit pingaartitaannut akerliuvoq
Demokraatit meeqqanut ikiorsiinermut aningaaslaersuutissatut siunnersuutai kalaallit naleqartitaannik suusupaginninnerusoq, Siumup siulittaasuata tulia Doris Jakobsen isumaqarpoq.
Meeqqat pingajorarterutaasa atugarliortut atugaasa pitsanngortinneqarnissaannut Demokraatit siunnersuutiminnut aningaasalersuinissamut siunnersuutai Siumup akerlerilluinnarpai. Partiip siulittaasuata tullia Doris Jakobsen qisuariaateqarluni ullumi allappoq.
- Aningaasanik allanik aallerfissatut tikkuarneqartut ilaat soorlu: Puisit amiinut tapiissutit affaannanngortinneqarnissaat, nunaqarfinni illuliornermut aningaasaliissutit 15 mill. kr.-ninik ilanngarneqarnissaat aammalu meeqqanut ileqqaakkat atorunnaarsinneqarnissaat piviusorsiunngitsutut nalilerneqartariaqarput.
- Taamatut aaqqiissutissanik tikkuaaneq kalaallit uagut pingaartitatsinnik annertuumik annikillisaaniarnertut nalilerneqartariaqarpoq, tassuunakkut Demokraatit erserseqqiinnarpaat nunaqarfinnut piniartunullu tapersersuinnginnertik qanoq annertutigisoq.
- Piniartut meerartallit isertitamikkut kipiluttunartumik inissisimareersut annerusumik eqqorneqaqqissappata piniartuuneq kalaaliminernillu peqqinnartunik nerisaqartarnerput annertuumik eqqorneqassapput minnerunngitsumik piniartut meerartaat eqqarsaatigalugit.
- Nunatsinni nappaat tuberkulose annertuumik atugaareersoq minnerulersinneqarnavianngilaq nunaqarfimmiut immikkoortillugit iliulissagutta aamma meeqqanut ileqqaakkat atorunnaarsinneqassappata siunissami meerartatta atugarissaarnerunissaannut qulakkeerinninneq suli annertunerujussuarmik millisaaffigineqassaaq, taamaammat Demokraatit siunnersuutaat assorsuaq akueriuminaatsutut nalilertariaqarpoq
Doris Jakobsen tikkuagaqanngilaq Siumut qanoq ililluni meeqqat pisariaqartitaannik suliniuteqarnerluni, qanorlu tamakku aningaasalersorneqassanersut, eqqaavaali 'suliniutit annertuut naalakkersuisutigut ingerlanneqartut'.