S & IA-mi tunuliaquttat aalassaqqasut: Isertitakinnerpaanut Naalakkersuisut iliuusaat naammaginanngillat
Siullermik IA-p politikkikkut oqaaseqartartua, Mariane Paviasen piumasaqarpoq Naalakkersuisut piaarnerpaamik isertitakinnerpaanut ikiorsiissutinik pilersitsissasut. Maannalu Siumup politikkikkut oqaaseqartartua piumasaqalerpoq partiip qullersai immikkut ataatsimiisinneqassasut Naalakkersuisooqatigiit isertitakikkerpaanut iliuusaat pillugit nalilersuisoqarniassammat.
Assartukkat akisunerulernissaannik RAL-ip nalunaaruteqarnera juullip sianerpalaavatut nipeqarani pisussanik aarlerinninnermik nipilimmik sianaalaartitsivoq.
Naalakkersuisooqatigiimmi Inatsisartuni tunuliaqutaat aalassassimaarput, pingaartumik ulluinnarni nioqqutissat suli akisunerulernissaannik assartuinermut akit qaffannerat kinguneqartussaq pillugu:
- Naalakkersuisut maanna utaqqinatik iliuuseqarnissaat pisariaqarpoq, innuttaasut isertitakitsut pillugit iliuusissat assigiinngitsut saqqummiunneqarnissaat pisariaqarpoq. Naatsorsuutigaarput Naalakkersuisut isertitakinnerpaat eqqarsaatigalugit ikiorsiinissamut iliuusissanik saqqummiussissasut, IA-p politikkikkut oqaaseqartartua, Mariane Paviasen piumasaqarnertik pillugu erseqqissaavoq nangillunilu:
- Inuit Ataqatigiit piumasaraarput innuttaasunut isertitakinnerusunut iliuusissat pillugit suliamik piaartumik aallartitsisoqaqqullugu.
Nunatsinni sulisitsisut aamma mianersoqqusereerput RAL-ip assartuinermut akinik qaffaanerata kingunerisaanik inuiaqatigiinnut annertuumik eqquisoqartussaasoq.
Tamatumalu saniatigut aamma Brugseni Pilersuisorlu KNR-imut sapaatip akunnerata siuliani nalunaaruteqarput RAL-ip akitsuinerata kingunerisaanik ulluinnarni nioqqutissat akitsorneqarnerannik kinguneqassasoq.
Innuttaasut akissaarullutik tunniutiinnarnissaat Siumumit arleqqutigineqarpoq
Siumup Inatsisartuni politikkikkut oqaaseqartartua aammalu partiip siulersuisuunerini ilaasortaq, Doris J. Jensen maanna piumasaqalerpoq partiip siulersuisuuneri aammalu Inatsisartuni ilaasortaatitai piaartumik katersuutsinneqassasut akit qaffakkaluttuinnarnerat pillugu iliuuserineqartut nalilersorneqassammata:
- Akinik qaffaasaqattaarneq inuiaqatigiinnut artukkiivoq aarlerinarporlu suli ajornerusumik siunissami qaninnerusumi killiffeqarnissarput, tassami inuppassuit ulluinnarni inuuniarnermut artorsarlutik tunniutiinnarnissaat aarleqqutigineqartariaqarpoq, Siumup politikkikkut oqaaseqartartua Doris J. Jensen tunngavilersuivoq nangillunilu:
- Akissaatitigut qaffaassutissat isumaqatiginninniutigineqarnerini isumaqatiginninniarnerit suliluunniit naammassinngitsut pisissutigineqarsinnaasut annertuumik mangiarneqalereertut takuneqarsinnaavoq tassanilu RAL-ip ukiumi nutaami qaffaassutissai tikkuarneqaannarsinnaapput.
Nunaqarfiit illoqarfiillu isorliunerusuniittut ernumanartorsiorput
Siumup tungaanit akit ataatsimut isigalugu qaffakkiartupiloorneri ernumanartumut killitsitsisimasut aarleqqutigineqarpoq, taamaattorli aamma taassuma qaavatigut nunaqarfinni illoqarfinnilu isorliunerusuniittut ulluinnarni nioqqutissanik akitsuiffigineqarnissaasa kingunissaa annertuumik aarleqqutigineqartariaqarsorineqarpoq:
- Taamatuttaaq Pilersuisumi akit qaffasereertigisut suli qaffannerunissaat suaarutigineqareersoq inuiaqatigiit ajorsartussianngortinneqarnissaat takorloorneqarsinnaanngilarluunniit, inuuniarneq ilungersunareertigisoq qaavatigut suli aamma ilungersunarninngorlugu killiffeqartoqassappat tamanna inooqataaffigineqarsinnaanngilaq. Ilungersunarluinnartumik killiffeqarnitsinni, inuit inuussutissanut allanullu akissaat naleerukkiartuinnarpoq.
Doris Jakobsen Jensen aamma innersuussivoq ikummatissat pillugit isumaqatigiinniarnerit suli inerneqanngitsut aappaagulu ikummatissanut akit appasittut qulakeerneqanngitsut:
- Inuiaqatigiittut akit qaffakkaluttuinnarnerisa unikaallatsinneqarsinnaanerat pillugu ataatsimoorluta iliuuseqaqatigiittariaqarpugut, tassami innersuussutigiinnarsinnaavara ikummatissat pillugit isumaqatigiissut naasussaammat nutaaq pillugu isumaqatigiinniarnerit suli naammassineqanngillat. Ikummatissanut akit appasittut ingerlaannarsinnaassanngippata, aarlerinartorujussuuvoq innuttaasut ulluinnarni nioqqutissanik akitsornerinit annertuumik eqqugaareersut qaavatigut aamma ikummatissatigut akinit artukkerneqassappata, pingaartumik isorliunerusuni nunaqaqarfinni illoqarfinnilu innuttaasut eqqugaareernermik qaavatigut suli sakkortunermik eqqorneqarsinnaammata.
Naalakkersuisunit oqaaseqartitsiniarluta Sermitsiaq.AG-mit sulissutigaarput.