S: Ingerlatsiviit allanngortinneqaannarsinnaanngillat
Siumumiit Martha Lund Olsenip naalakkersuisut Paamiuni Imarsiornermik Ilinniarfiup illuutaasa innarluutilinnut inuusuttunut ilinniarfinngortitsiniarnerat isumaqatiginngilaa
Ingerlatsiviit imaaliallaannaq allanngortinneqarsinnaanngillat.
Taama Siumut sinnerlugu Inatsisartunut qinigassanngortittoq Martha Lund Olsen Demokraatiniit Palle Christiansenimut ilinniartitaanermut naalakkersuisuugallartumut oqarpoq.
Tamanna pivoq Paamiuni Imarsiornermik Ilinniarfik aasaru Nuummut nuuttussanngormat, tassungalu atatillugu ilinniarfik innarluutilinnut inuusuttunut ilinniarfinngortinniarneqarluni.
- Ilimaginngilara Umiartornermi Ilinniarfiup init taamaatitassaat inuusuttunut innarluuteqartunut tulluutuunissaat, Martha Lund Olsen nalunaarummi allappoq.
Aalajangiineq nalorninartoqartippaa
Ingerlatsiviup allap allanngortinneqarneranik assersuutissaqarpoq.
- Najugaqarfik Elisibannguaq atuarfittut atorneqarnikuuvoq, matulermat inersimasunut innarluuteqartunut atorneqalerpoq, illu imminermit ukiorpassuarni inersimasunut najugaqarfissatut tulluutinngilaq. Soorlu tamanna aamma takornartaanngitsoq ulloq unnuarlu angerlarsimafferpasuarni, allamik siunertaqarlutik sananeqarnikut kingusinnerusukkut ulloq unnuarlu angerlarsimaffitut atugaalersimasut, Martha Lund Olsen nassuiaavoq.
Siumumeersup upperinngilaa sukumiisumik misissuinermik tunngaveqarlutik naalakkersuisut Paamiunit ingerlatsivik allanngortinniarlugu aalajangersimassasut.
- Sulisussat ilinniagaqarluartuusimanissaat qulakkeerneqarnikuuva? Soormitaava inuusuttunut innarluuteqartunuk atuarfissaaannik / ilinniagaqarfissaannik nutaamik siunertamut tulluuttumik sanasoqarsinnaangila? Naammagittaannartoqarsinnaangilaq, inuusuttunut innarluuteqartunut tulluuttumik sanaartortoqarnissaa piumasarisariaqarparput, Martha Lund Olsenip Palle Christiansen aperaa.