Sakkukinnerusumik pillarneqarnissaa neriuutigaat
Vestre Landsret 17-inik ukiulimmut, Aalborgimi arnamik 85-inik ukiulimmik toqutsisimasumut, suliassami aalajangiissaaq.
Eqqartuussissuserisunilu Nicholas Symesilu 17-inik ukiullip John A.H. Møllerip neriuutigaa Landsrettimi sakkukinnerusumik pineqaatissinneqassalluni, taamatut allappoq nordjyske.dk.
Kalaaleq angut inuusuttoq ukioq manna januaarip 27-anni Aalborgimi byrettimi inatsimmi pineqaatissiissutit sakkortunersaannik pineqaatissinneqarluni ukiuni arfineq-pingasuni parnaarussivimmiittussanngortinneqarpoq. Tassa inunnut 18-it inorlugit ukiulinnut toqutsinermi pineqaatissiissutit sakkortunersaannik.
John Arpaarti Hans Møller 15-iinnarnik ukioqarpoq, 2007-imi maajip 26-anni piinsip arfininngortuani arnaq utoqqaq toqukkamiuk.
Taanna perorsaasut inersimasut marluk paaqqinnittarfimmilu Dybvadimi, piffissami 2006-imi novembarimiit 2007-imi juunimut inissinneqarfigisamini, najugaqartut allat arlallit peqatigalugit Aalborgimukarpoq illoqarfimmi karnevalertoqarneranut peqataajartorluni.
Pisuunera byrettimi aalajangerneqareersimavoq. Taamaattumik pillaatisiassaata sivisussusaa kisimi allanngortinneqarsinnaavoq, tamatuminngalu naliliissapput Vestre Landsrettimi eqqartuussisut inatsisilerituut pingasut eqqartuusseqataasullu pingasut.
Naatsorsuutigineqarpoq sisamanngornerup ingerlanerani aalajangiisoqassasoq.