pinngortitamik mingutsitsineq
Sakkutooqarfiusimasun mingutsitsinermit Sermitsiaq assinik perusuppoq
USA-p sakkutooqarfigisimasaani eqqakkanik qimaannakkanit assilisat Sermitsiaq.AG-p nittartakkamini takuneqarsinnaanngortikkusuppai
Camp Centurymi, Pituffiup ungasinngisaani sermersuup ataani sakkutooqarfiusimasoq, eqqakkat pinngortitamut mingutsitsisut kia akisussaaffiginerai Naalakkersuisut Danmarkillu oqallisigileruttorpaat.
Maani nunami mingutsitsup saliinermut aningaasartuutit akilissagai pissuseraarput. USA-lu mingutsitsisuugami akiliisariaqarpoq.
USA-llu nunatsinni sakkutooqarfeqarsinnaasoq Danmarkip kisimi akuersissutigisinnaavaa.
Atuaruk: Aaja Camp Century pillugu isumasioqatigiinnermut pakatsisoq
Akisussaaffik danskiniippoq
Mingutsitap salinneqarnissaanut danskit saliissallutik pisussaaffigaat. Akisussaaffiimi Kalaallit Nunaaniissinnaanngilaq. Nunatsinnilu akileraartartunut aningaasartuutit Danmarkip akilequsinnaanngilai.
Sakkutooqarfiusimasut sorsunnersuup aappaani nordamerikamut qaartartumeerisoqassappat kalerrisaarisutut atorneqarnikuupput.
Sakkutooqarfiit amerlanerit
Sakkutooqarfiusimasut arlaqartut Nunatsinni qimaannakkat nalunngilagut. Qimaannarneqarsimasullu eqqagassai pinngortitamut mingutsitsillutik.
Ikateq Bluie East 2 Tunumiittoq Maarrarlu Bluie West 4 Nuup kitaaniittoq eqqaaginnarsinnaavagut.
Dye stationilu sermersuup ataaniittoq sermip aakkiartornerani mingutsitsinissamut ulorianaatilik aamma qimaannarneqarnikuuvoq.
Sakkutooqarfiusimasut qimaannavillugit qimanneqarnikuupput. Tassa illumi pisattat nikisinneqannguaratik qimanneqarsimallutik.
Takorluulaariaruk uagut Times Squaremi New Yorkimiittumi illuikkiaq pisallu sinneri qimaannaraluarutsigu qanoq pisoqassagaluarnersoq.
Atuaruk: Kalaallit Nunaata Danmarkillu akornanni ajornartorsiorneq
Assinik perusuppugut
Assinik nassiussigit nittartakkatsinni atugassanik. USA-p mingutsitsinerani assinik ilioraagutta oqallinneq sunnerneqaratarsinnaasoq ilimagaarput.
Assinik uunga nassiussisinnaavutit: redaktion@sermitsiaq.gl