Sakkutuussatut Qaanaami ilinniarfik
Inatsisartuni ilaasortaq Anthon Frederiksen sakkutuussatut Qaanaami ilinniarfeqalernissaanik siunnersuuteqarpoq.
– Qaanaaq sakkutooqarfimmut, Thule Air Basemut qanereerpoq, Anthon Frederiksen inatsisartuni oqaluuserisassatut siunnersuunni pillugu taama oqarpoq. Siunnersuutaa inatsisartuni ukiaru oqaluuserineqarnissaa ilimanarpoq.
– Qaanaami inuussutissarsiutinut inerisaanissamut ilinniarfinnilluunniit aamma periarfissaqarpianngilaq. Taamaammat Qaanaami inuusuttut sakkutuussatut ilinniarnissaat piukkunnarpoq.
– Inuusuttut ilinniagartik sumut atussuaat?
– Nalunanngereerpoq nunatsinni sakkutuutut inuussutissarsiortoqarsinnaangimmat. Ilinniagarli inuunerup ingerlaqqinissaanut allorniutaasinnaavoq. Aamma takorloorneqarsinnaavoq ilinniareersimasut Thule Air Basemi atorfinitsinneqartut.
– Nalunngilara Qaanaap Kommuneata siunnersuutiga iluarisimaaraa. Namminneerlutik aamma sakkutuussatut Qaanaami ilinniarfimmik pilersitsinissamik oqaluuserinnittareerput, Anthon Frederiksen oqarpoq.
Qaanaap borgmersteria, Jens Danielsen: - Siunnersuutitsialaavoq. Illoqarfitsinnut ajunngitsumik sunniuteqassaaq. Inuusuttut illoqarfinnit allaneersut sakkutuussatut illoqarfitsinnut ilinniariartortalersinnaanissaannik kinguneqassaaq. Aamma sakkortooqarfimmit eqqaamiorisatsinnit Thule Air Basemit iluaqusersorneqarsinnaassaagut, Jens Danielsen oqarpoq.