Sakkutuut umiarsuaataat ajoquteqartut angalaqquneqanngillat
Sakkutuut umiarsuaataat marluk Knud Rasmussen-itut ittut motoorimik ajornartorsiuteqarnerat pissutigalugu angalaqqusaajunnaarput, DR.dk allappoq.
Sakkutuut umiarsuaataat alapernaarsuutit marluk teknikkikkut ajoquteqarnerat pissutigalugu maannakkut Nuummiipput.
Umiarsuit motoriminnik ajoquteqartut paasinarsivoq, Sakkutuullu imarsiortut ajoqutit sumik pissuteqarnersut paasisimanngilaat, taamaattumillu sakkutuut atortuinik pisiortornermullu ministereqarfiup (FMI) umiarsuit taakku marluk angalaqqunngilluinnarpai.
Illersornissamut ministeriaqarfimmit allagaatinik takunnissinnaatitaaneq tunngavigalugu DR.dk taama allappoq.
Umiarsuaq Triton, umiarsuit taakku marluk suliassaannik tigumminnikkallartussaq, maannakkullu Kalaallit Nunaata eqqaani suliassanik isumaginnittussaq, aamma teknikkikkut ajornartorsiuteqalersoq, Nuullu eqqaani iluarsaanneqartariaqartoq, DR-ip aamma allaaseraa.
Kalaallit Nunaanni eqqaanilu Issittumi Sakkutooqarfiup suliassaminik naammassinninnissaa teknikkikkut ajornartorsiornerujussuup ajornakusoortippaa.
Sakkutuut umiarsuaataat teknikkikkut ajornartorsiortut pillugit nutaarsiassaq ullormi Danmarkimi illersornissamut ministerip Troels Lund Poulsenip Kalaallit Nunaannut tikeraarnerani, aammalu Naalagaaffinngornissamut nunanullu allanut tunngasunut naalakkersuisoq Vivian Motzfeldt peqatigalugu illersornissamut isumaqatigiissut, tamatumalu Issittumut sunniutai pillugit Nuummi innuttaasunik ataatsimiisitsinissamut qaaqqusineranni, pivoq.