Saligaatsoq
Saliinersuaqarpoq
Pingasunngormat nunami illoqarfiit anginersaanni marlunni eqqagassarpassuit katersorneqarput
Inuppassuit piumassusillit pissutigalugit pingasunngormat Nuummi Sisimiunilu nunami illoqarfiit annersaanni saliinersuaqarpoq, ukiumoortumik avatangiisit ulluannut Saligaatsumut atatillugu.
Saligaatsoq 2011-mi aallartimmalli saliinermik aaqqissuussinermi peqataasartut ukiut tamaasa amerliartuinnavissimapput, avatangiisillu ulluat ukiut tamaasa pisartunngoriartuaarpoq. Taamaasilluni ukioq manna suliniummi pitsaasumi Nuummi ingerlatsiviit 20-t missaanniittut, Sisimiunilu qulit missaanniittut, peqataapput.
Atuaruk: "Innuttaasut saliipput"
Aaqissuussisut malillugit ulloq saliiffissuaq tunniusimasumik periusaavoq avatangiisit ingerlatsivinnut innuttaasunullu sammilersinnissaannut. Suliniut saniatigut suliniuterpassuarnik sammisarpassuanillu imaqarpoq, illua'tungeriit assigiinngitsut, tamarmik avatangiisinik saligaannerusunik kusanarnerusunillu kissaatigisallit, akulerutsillugit.