Salloqittaatinik aningaasaliortut tigusarineqartut
Angutit inuusuttut pingasut salloqittaatinik aningaasaliorsimasutut Aasianni politiit tigusaraat. Taakkua ulluni 20-ni tigummigallagassanngortinneqarput.
Aasianni angutit inuusuttut pingasut salloqittaatinik aningaasaliorsimasutut tigusarineqarput. Tamarmik 20-t inorlugit ukioqarput.
- Qularnaarlugu nalunngilarput illoqarfimmi pisiniarfiit ilaanni 1000 koruuniusaaq 500 koruuniusaarlu atorsimagaat. Pisiniarfimmi sulisup taakkua kikkuunerannik paasitippaatigut, Aasianni politeeqarfimmi pisortaq Aqqaluk Petersen oqaluttuarpoq.
Angutit inuusuttut pingasut aningaasat qarasaasiaminnik sanasimavaat, tigusarineqarnerannullu atatillugu najugaanni aningaasaasat amerlanerusut nassaarineqarput.
- Oqaatigisinnaanngilarput aningaasaasaliat qanoq amerlatiginersut, neriuppugulli amerlanerusunik kaaviiaartitsilersimanngitsut. Pisimasoq erloqinartorujussuartut isigaarput. Pinerlunneq sualuttorujussuuvoq, Aqqaluk Petersen oqarpoq.
Tigusarineqartut qarasaasiaat arsaarinnissutigineqarput maannalu Danmarkimut nassiunneqassallutik, tappavani politiit pinerluttulerinermi teknikkikkut immikkoortoqarfiata inuusuttut qarasaasiaat takussutissanik misissuiffigissallugit.