Sallunaveeqqutitut tiguaasup tigummigallarneqarnera sivitsorneqarpoq

Aaqqiagiinnginneq pissanganartoq Nunatsinnut attuumassutilik qaammatip ataatsip matuma siornatigut sakkortusinersaavoq, angutip 39-inik ukiullip Randersimeersup Herningimi arnaq utoqqaq inissiaani tigusarimmagu politiiillu naapertorlugit toqunniarlugu qunusaarlugu.

Angutip arnaq 65-inik ukiulik Møllegademi najukkaminut isilersoq tigusaraa. Pinngitsaalillugu inimut isertippaa nalaasaarfimmut torrullugu, akunnerup aappaata affaani qunusiaralugu oqartinniarlugu ernera sumiinnersoq.

39-inik ukiullip ernera sakkortuumik oqaluukkusuttorujussuusimavaa. Qularnanngitsumik oqaluunniaannarnagu...

Aningaasanik tillinnermut tunngasoq

39-inik ukiulik oqarpoq arnap ernerata Torben Nielsenip 572.000 koruuninik tilliffigisimagaani. Aniingaasanik tillinneq pisimanerarpaa angutit taakkua marluk Aasianni pinerluuteqarsimasunut inissiisarfimmeeqatigiikkallarmata. Taamatut sisamanngormat Herningimi eqqartuussivimmi nassuiaavoq, tassani politiinit sassartinneqarluni tigummigallarneqarnerata sivitsorneqarnissaa piumasaralugu, taamatut allappoq Herning Folkebladip quppernera nittartagaq aoh.dk.

Randersimiu 39-inik ukiulik januaarip 15-ianniilli parnaarussaaqqasimavoq, ilaatigut arnamik 65-inik ukiulimmik toqutsinissamik sioorasaarisutut, kiffaanngissusiiagaasimasutut nakuusersimasutullu unnerluunneqarluni. Eqqartuussisup tigummigallarneqarnera sapaatit akunnerinik sisamanik sivitsorpaa.

Nunatsinni qaartartoqarneranik kalerrisaarineq

Inatsisit tunngaviusut malillugit killisiorneqarnerani suli allamik unnerluutigineqarpoq - Torben Nielsenimik toqutsinissamik sioorasaarisutut. Tamatumunnga pissutaavoq 39-inik ukiullip Torben Nielsenimut inuulluaqussutaa immikkut illuinnartoq.

Siorna decembarip 28-ianni 39-inik ukiulik Randersimi allakkerivimmit poortukkamik nassiussivoq. Poortugaq Torben Nielsenip Aasianni postboksianut nassiussaavoq.

Torben Nielsenili, ulloq taanna arni saassunneqarmat, nalunaarfigineqarami Aasianni allakkerivimmi poortugaq aasinnaallugu pasitsappoq annilaangalerlunilu, politiillu attaveqarfigalugit.

Poortugaq ammarneqarmat sunaanersoq ledningilersorsimasoq tapemik qernertumik imusimasoq nassaarineqarpoq. Taavalu kalerrisaarisoqarpoq ersissutigineqarmat qaartartuusoq. Kalaallit Nunaanni qaartartunik immikkut ilisimasalinnik peqanngimmat Danmarkimi Forsvarskommandoen qaaqquneqarpoq.

Sumiinnneranik paasiniaagaluartoq

Aatsaat ullualunnguit qaangiuttut qaartartunik paasiniaasartut Kalaallit Nunaannut tikimmata paasineqarpoq qaartartuunngitsoq - tassaasorli gps-tracker, immikkut batteriiligaq.

Gps-tracker elektroniskimik suliaavoq sumiissusersiutitalik. Torben Nielsenip poortugaq angerlaassimasuuppagu 39-inik ukiullip sumiinnera paasisimassagaluarpaa.

Angerlaqqinngisaannassaaq

– Aasianni amutsivimmi suleqatigisimasannit paasisimavara Torben Danmarkimut nuussimasoq. Taamaattumik trackeri Kalaallit Nunaanni najugaanut nassiuppara neriuutigigakku poortugaq Torbenip najugartaavanut ingerlateqqinneqassasoq. Taava sumiinnera paasisimassagaluarpara, unnerluutigineqartoq eqqartuussivimmi nassuiaavoq.

Torben Nielsenip eqqunnginnerarpaa unnerluutigineqartup aningaasaatai tillissimallugit. Ullumikkut Danmarkimit kilometerinik tusintilinnik ungasitsigisumi isertuussami najugaqarpoq nassuerutigalugu angerlaqqinngisaannarunarluni.