Sanigutit nutaat
Naalakkersuisunngortussat misissuinernik suliniutinillu nutaanik tallimanngorpat ikkunneqareerunik ingerlaannaq aallartitsiniarput.
Naalakkersuisut tallimangorpat ivertereeriarunik pissutsit assigiinngitsut misissuiffiginiarpaat. Nunatta karsiata imaasa sunut atorneqarnerat iternga tikillugu misissorneqassaaq, aningaasanut Inatsimmi aningaasartuuteqarfiusut misissoqqissaarneqassapput, akileraarutit akitsuutillu misissoqqissaarneqassapput akileraartarnerullu tamakkiissumik qaqilerilluni isumalioqatigiissitamik pilersitsinikkut misissuiffigineqarnissaa allartinneqassaaq.
Isumaginninnermi aaqqissuussineq qaqilerneqassaaq, inissaaleqisut angerlarsimaffeqanngitsullu atugaat misissorneqassallutik.
Nunatta inuussutissatigut imminut pilersorsinnaanerata qanoq iliorluni annertusarneqarsinnaanersoq misissorneqassaaq, nunatsinnilu aalisakkanik tunitsiveqarneq sukumiisumik misissuiffigineqassaaq.
Inissianik attartortitassanik annertunerusumik sanaartortitserusunnerat naqissuserneqarpoq.
Meeqqat inuusuttullu atugaasa pitsaanerulersinneqarnissaat anguniarlugu immikkorluinnaq aamma iliuuseqartoqarnissaa anguniarneqarpoq, ilaatigut 'Meeqqat Illuinik' pilersitsinikkut.
Silap allanngoriartornerata malitsigisaasa inuttaasunit tamanit peqataaffigineqartumik iliuuseqarfigineqarnissaa anguniarlugu qaammarsaasoqarnissaa anguniarneqassaaq.
Nunaqarfiit aningaasarsiornikkut inissisimanerat ataavarnissamullu tulluussusiat misissorneqassaaq pilersaarusioqqinnermilu tunngaviussalluni.
'Pilersugaanermiit imminut pilersugarinermut' taallugu nuna tamakkerlugu iliuusissat pilersaarusiorneqassapput, matumani sulisinnaasut tamarmik nunatsinni Namminersulersumi iluaqutigineqalernissaat anguniarneqassalluni.
Nutaatut aamma Naalakkersuisunngortussat pilersinniarpaat aalisakkanik qalerualinnillu pisassiisartussat politikkimut attuumassuteqanngitsut.
Tamatumalu saniatigut piniartuunerup nunarsuarmioqatigiinnit akuerineqarnissaa anguniarlugu sukumiisumik paasititsiniaasoqarnisaa Naalakkersuisunngortussat siunniuppaat.
- Suleqatigiissutissaq pingaarnertutut anguniarusutatta sinaakkutaatut isigineqartariaqarpoq, suliassarlu tullinnguuttoq tassaavoq suliassat erseqqinnerusumik allattorneqarnissaat – qanoq suliarineqarnissaat aammalu aningaasalersorneqarnissaasa allattorneqarnissaat tullinnguuppoq. Tamanna piffissami aggersumi suliarineqassaaq, naalakkersuisunngortussani siulittaasussaq Kuupik Kleist, Inuit Ataqatigiit, nassuiaavoq, naalakkersuisooqatigiinnissamik isumaqatigiissut Hans Egedep Illuani ullaatungaani atsiorneqarmat.
Naalakkersuisooqatgiittussanngortut isumaqatigiissutaat talerpiatungaani aaneqarsinnaavoq...