Sapaatip akunnerata naanera Nuummi politiinut eqqissisimasoq
Nuummi politiit eqqissisimanartumik taaneqarsinnaasumik sapaatip akunnerata naanersiorpaat - annertuumik akornusertoqanngilaq, taamaattoq angerlarsimaffinni eqqissiviilliornernut, nakuusernernut tillinniarnernullu orniguttariaqarsimallutik.
Katillugit angerlarsimaffinni eqqissiviilliornerit politiinit orniguffigineqartariaqarsimapput, pisunilu pingasuni meeqqartaqarpoq. Politiit taamaattut inunnik isumaginnittoqarfimmut nalunaarutigisariaqarsimavaat iliuuseqarfigisassasut.
Arnaq nakuuserni peqqutigalugu tigusarineqartoq
Sisamanngormat ualikkut politiit blok P-p silataanut aggersarneqarput. Politiit takkunnerani paasineqarpoq arnat 44-nik 45-nillu ukiullit kammattut. Arnaq 44-nik ukiulik tigusarineqarpoq45-nik ukiulik kiinaatigut ujaqqamik milorsimagamiuk.
Siusinnerusukkut nakuusersimasutut tigummigallarneqarsimammat nakuusersimasutut unnerluutigineqarpoq, tallimanngormallu ualikkut eqqartuussivimmut sassartinneqarluni ullunilu 14-ni tigummigallagassanngortinneqarluni eqqartuunneqarnissaa siunertaralugu.
Angutit marluk tillinniat tigusarineqarput
Arfininngormat unnukkut politiit biilertillutik angutit 22-nik 27-inillu ukiullit marluk maluginiarpaat, pc-nik arlalinnik spillinillu tigummiartut toqqorterniakkaminnik. Angutit politiinit tigusarineqarput, paasineqarpoqlu Nuussuarmi Butik Nathaliemit tillissimagaat.
Angutit siusinnerusukkut pisuni taamaattuni ilisimaneqarput, taamaattumik isertitsivimmi unnuisitaasimapput killisiorneqartussatut. Sapaatiummat ualikkut iperaragaapput.