SAR: Takornariaq ajoqusersimasoq kalerrisaarititsisoq
Politiit sisamanngornermi Arctic Circle Trailimi kalerrisaarummik tigusaqarput. Arnaq 55-inik ukiulik ajoqusersimasoq paasinarsivoq.
Sisamanngornermi nal. 13.35 Kalaallit Nunaanni Politiit kalerrisaarummik tigusaqarput.
Kalerrisaarut tigummiartagaq pisuttunit atorneqarsinnaasoq pineqartoq, pigaartut pisortaat Bent Johnsen oqarpoq.
- Sumut tunnganersoq nalileruminaappoq, kisianni kalerrisaarut Arctic Circle Trailimit Sisimiut Kangerlussuullu akornanneerpoq. Taamaammat qulimiguulimmik Kangerlussuarmit sumiiffimmut aallartitsivugut, Bent Johnsen, Sermitsiaq.AG-mut oqaluttuarpoq.
Ingerlaqqissinnaanngitsoq
Annaassiniartartut pisuttunut kalerrisaarisunut attaveqalermata, arnaq Litauenimeersoq ajoqusersimasoq pineqartoq paasinarsivoq, taanna pisoqqissinnaanngilaq.
Arnaq 55-inik ukiulik uinilu qulimiguulimmut ikineqarput, Kangerlussualiaanneqarlutillu.
Juulip qiteqqunnerani pisuttut allat marluk aamma pisuttarfimmut aaneqarput. Tassani angut arnarlu 40-t sinnerlugit ukiullit napparsimalersimasut pineqarput.