tusarniaanerit
Sara Olsvig: Inuit Pisinnaatitaaffiinut Siunnersuisoqatigiivi nukittorsarneqassapput
Inuit Pisinnaatitaaffiinut Kalaallit Nunaata Siunnersuisoqatigiivinut inatsissatut siunnersuut tusarniaassutigineqareernerata kingornat isorineqartut arlallit Naalakkersuisunit isiginiarneqarput.
Inatsisissatut siunnersuut tusarniutigineqarsimasoq Siunnersuisoqatigiit aamma tikkuarsimasaannik assersuutigalugu ilaasortat ikinnerulernissaannik namminerisamillu allattoqarfeqalernissaanik imaqarpoq:
- Inatsisissatut siunnersuummik anguniagaq pingaarneq tassaavoq siunnersuisoqatigiit nukittorsarneqarnissaat nammineernerulernissaallu, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig (IA) oqarpoq nangillunilu
- Tusarniaanermi akissuterpassuit nuannaarutigaagut, tassuuna takutinneqarmat siunnersuisoqatigiit suliaat soqutigineqartut taamaattumik aamma inatsisissatut siunnersuutip inaarutaasumik suliarinera tusarniaanerit tunuliaqutaralugit ingerlavoq. Uani soqutigisallit tusarniaanermut akissutaanni isornartorsiuinerit pingaarnerit isiginiarneqassapput.
Ullut kingulliit Inuit Pisinnaatitaaffiinut Kalaallit Nunaata Siunnersuisoqatigiivinut inatsisissatut siunnersuut tusarniutigineqaqqammersoq sammineqarpoq.
Inatsisissatut siunnersuut avataaneersunit siunnersuisoqatigiillu namminneq nalilersuinerannik marlunnik tunuliaqutaqarpoq. Inatsisitigut allannguinissaq pisariaqartoq, Siunnersuisoqatigiit nukittorsarneqassasut nammineernerulernissaallu isumannaarneqassasoq taakku tikkuarpaat.
- Tusarniaanermut akissutit tusaaniarneqarsimanerat assersuutissaqarpoq, inaarutaasumik inatsisissaq Naalakkersuisut siunnersuisoqatigiit siulittaasussaannik toqqaasassasut ilanngunneqanngilaq. Suleriaaseq maannamut atuuttoq ingerlatiinnarneqassaaq, tassalu siunnersuisoqatigiit nammineerlutik siulittaasussaminnik toqqasassapput. Tamatuma saniatigut tusarniaanermi tikkuarneqartut arlallit allat aamma naaperiuteqarfigineqassapput, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfik allappoq.