Sara Olsvig Siumup inuusuttortaanut ilaasortaasimanersoq qulaajarneqarli
Inatsisartunut ilaasortap Andreas Uldumip, Demokraatit, paaserusuppaa Sara Olsvig Siumup Inuusuttunut Suleqatigiiffianut ilaasortaasimanersoq
Sara imaluunniit Siumup Inuussuttai? Kina kukkua? Andreas Uldumip tusagassiorfinnut nalunaarunni taamatut aallartippaa nangillunilu:
- Demokraatit isumaqarput piffissanngortoq paasisariaqalerlutigu Sara Olsvig Siumup Inuusuttunut Suleqatigiiffianut ilaasortaasimanersoq ilaasortaasimannginnersorluunniit. Tassami paasinarsimavoq polikkikkut inuusuttut suleqatigiiffianni ilaasortat amerlassusaat apeqqutaasoq suleqatigiiffiup pineqartup Sorlammit tapiiffigineqarnissaanut.
Nuummi Siumup Inuusuttunut Suleqatigiiffia (SIS Nuuk) qineqqusaarnermi oqarpoq maanna folketingimut ilaasortaq, 32-inik ukiulik Sara Olsvig, Siumup Inuussuttaanut suli ilaasortaasoq. Sara Olsvig nammineq oqarpoq Siumup Inuusuttortaanut ilaasortaasimanngisaannarluni. Qularnanngilaq oqarnerit taakkua marluk ilumoortuusinnaanngitsut. Tamanna tunuliaqutaralugu Naalakkersuisunut apeqquteqarpunga inuusuttut politikkikkut suleqatigiiffianni ilaasortat amerlassusaat suleqatigiiffiup aningaasaqarneranut sunniuteqarnersoq. Naalakkersuisut akissutaat ersarissorujussuuvoq. Ilaatigut allassimavoq:
Sorlaap malittarisassai malilluit piumasaqaataavoq qinnuteqarnermi ilaasortat amerlassusaat ilanngunneqassasoq. Ilanngullugu paasissutissiissutigineqassaaq tapiiffigineqarnissamut ilaasortat amerlassusaasa ikinnerpaaffissaannik piumasaqaateqartoqarmat. Kattuffiit peqatigiiffiillu ingerlatsinermut tapiiffigineqarnissamik qinnuteqaataanni ilaasortat amerlassusaat aamma tapiissutit annertussusaannut tunuliaqutaasarput.
Allanut oqaatigalugu ilaasortat amerlassusaat pingaaruteqarpoq. Tamanna tunuliaqutaralugu aamma oqaatigineqassaaq pingaaruteqarmat ilaasortanut allattorsimaffik nassiunneqartoq tamakkiisumik nutarterneqarsimassammat eqqortuussasllunilu.
Apeqqutinnut akissumminni Naalakkersuisut ilanngullugu paasissutissiissutigaat inuusuttut suleqatigiiffiisa ilaat, 2010-mi tapiiffigineqarnissamik qinnuteqartoq tassaasoq Siumup Inuussuttunut Suleqatigiiffia. Ilimagisariaqarpoq Sara Olsvigip aqqa ilaasortat allattorsimaffianni allassimassasoq, tamatumunnga atatillugu Siumup Inuusuttaasa Sorlammut nassiussimasaanni. Tassalu tamanna ajornartorsiutaavoq, tassa Sara Olsvig Siumut Inuusuttaanut ilaasortaasimappat, tamannali manna tikillugu ilumuunnginnerarpaa.
Taamaattumik piffissanngorpoq Siumup Inuusuttaasa oqaaseqarnerminut uppernarsaammik saqqummiussinissaa, tassa Sara Olsvig ilaasortaasimasoq. Tamanna assersuutigalugu pisinnaavoq ilaasortaanermut akiliummik akiliisimaneranut assigisaanilluunniit uppernarsaammik saqqummiussinikkut.
Siumup Inuusuttaasa tamanna uppernarsarsinnaanngippassuk Demokraatit isumaqarput Sorlaap ilaasortaanermut allattorsimaffiit, Siumup Inussuttaasa ukiuni kingullerni tallimani nassiuttarsimasai, misissoqqissaassagai Misissuinerup tamassuma takutippagu Siumup Inuusuttaasa ilaasortanut allattorsimaffik ilaasortaanngitsunik ilalersorsimagaa, taava suleqatigiiffik soorunami inatsit atuuttoq naapertorlugu tamatumunnga akisussaatinneqassaaq, soorluttaaq pissusissamisuussasoq tunngavissaqanngitsumik tapiissutit utertinneqarnissaat.