Sarfaq Ittuk kinguaattooqqavoq: Umiarsuup avannamut ingerlaqqinnissaanut motorimi atortut taartissaat utaqqineqarpoq
Arctic Umiaq Line-ip pisortaa, Jens-Jakob Lennert Sandgreen oqaluttuarpoq motorip atortuisa ilaata taartissaa utaqqineqartoq, taannalu pissarsiarineqarpat umiarsuup avannamukarnini nangissavaa.
- Umiarsuaq aallarsinnaagaluarpoq, kisianni atortussamaatip amigaatigineqartup mobilitut mikitigisup amigaataaneratigut motori unittuussagaluarpat umiarsuaq arriitsuaraannarmik ingerlaalissaaq, tamannalu ilaasutsinnut misigisitikkusunngilarput, Arctic Umiaq Linep pisortaa, Jens-Jakob Lennert Sandgreen Sermitsiaq.AG-mut oqarpoq.
Taartissamaat amigaataasoq timmisartumik tikissaaq
Taartissamaat amigaatigineqartoq Danmarkimiit Nuummut timmisartukkut apuunniarneqarpoq, taannalu Sarfaq Ittummit tiguneqarniariarpat umiarsuaq aallaqqissinnaanngussaaq:
- Massakkut taanna taartissamaat utaqqivarput, naatsorsuutigaarpullu akunnialuit iluini apuutissasoq, taamaalippallu umiarsuaq ingerlaqqissinnaanngussaaq, Lennert Sandgreen oqarpoq.
Ilaasut umiarsuarmi unnuipput
Taassuma aamma erseqqissaatigaa umiarsuup ilaasuisa susoqarpiarnersoq tamarmik nalunngikkaat aammalu aallaqqinnissaanut sillimatinneqartut umiarsuarmi issimariinngikkunik ikiartornissaminnut:
- Ilaasuvut Nuummi najugaqanngitsut umiarsuarmi unnuinikuupput, aamma nerisassaqartinnissaat akeqanngitsumillu internetsimik atuisinnaanissaat isumaginikuuarput, aamma ullaaq qulingiluanut qiteqquttoq killiffik pillugu ilisimatitsivugut, Jens-Jakob Lennert Sandgreen oqaluttuarpoq nangillunilu:
- Piffissami aggersumi ilaasussatsinnut maluginiaqqussavarput kinguaattoorneq pissutaalluni umiarsuup ingerlaarnissaanut pilersaarutit allanngortittussanngoratsigit, ullumi kingusinnerusukkut unnuguluunniit tamanut nalunaaruteqarumaarpugut umiarsuup angalanissamut pilersaarutai qanoq allannguuteqartoqarnersut.
AUL-ip nalunaarutai aamma uani nakkutigikkit: